U Montri Rangbah ka jylla, u Conrad K Sangma da ong u wa hanla ka sorkar da rai ko wow pynthymme ya ka karkhana pynmih khyndawbilat, ka Mawmluh Cherra Cement Limited (MCCL) deiwa ya krehlang noh wa ki Company ki bru samen kawa tip kam ka Joint Venture, tangwa ka sorkar rap boon hap ko wow pynlut wei i bhah leh iwa boon man ko i yong ka sorkar wei ym ye ka Company wow kamtre næ wow leh katwa ngait ya katai ka karkhana.
Ynne ka sngi u MLA ka Congress na Umroi, u George B Lyngdoh da kylli u hajrong i thmu yong ka sorkar wow ekti pynlai noh ya ka MCCL cha ki Company ki bru samen, wei ya i daw wa pynman ya ka sorkar wow chim ya katai ka rai.
U George da pynsñiaw u leh yei tieñ ki tre chnong lada e pynlai ya katai ka karkhana cha ki Company neibhah wa ye wow pynim du chipor wei daw tih ko naphang leh ya u moochuni na ka thaaiñ iwa ye wow wanrah ya i chah pynjæd ya ka rymaw.
Hawa jubab yeiwa kylli, u Montri Rangbah da pyntip u wa hadooh katni ym pu chna ya ki kyndon hajrong itai i thmu wow ekti ya ka MCCL, wei da ong u leh wa neibynta wow chim wai ya i khyndaw næ paarmoo, hap leh wow em i yutip yong ki tre chnong wa kynthup ya ka Dorbar yong ka Mawmluh wa ka Hima Sohra. Da pyntikna u leh wa ka sorkar daw pait bniah ko wa ym em i pyndoohnong ya ka thaaiñ khamtam wym ktah ko ya ka rymaw.
Ha iwi won i liang, u Conrad da pyntip u leh wa ha ki 12 snem wa da dep, ka sorkar da dep ko wow pynlut T. 303 klur neibynta ka MCCL, tangwa ym em mihsoh, iwa da pynman ya katni wa ka sorkar u lai noh ko da ka Joint Venture heiwa daw hap pynlut kamwa T. 190 klur neibynta wow pynkhai im biang ya ka MCCL.
Da pyntip u wa ka MCCL da hap lai ko du hei doohnong nadooh u snem 2007-08 wei nadooh 2018-19 i doohnong ka MCCL da ku chadooh T. 234 klur, hanla ka sorkar da e ko yei kyrchaan ya katai ka karkhana tangwa ym ye wow khai khlieh, wei ym ye du wow pynmih khyndawbilat nadooh u Wisu (Mar) 2020.
