Ki seiñ niam wa em ha kylleiñ ka jylla Meghalaya da mynjur ki wow leh yeiwa emkaam ha ini i yaleh pyrchah yei artatien ki bru wow chim tika yada na ka khlam COVID-19 kamjooh pyrchah yei pynpoor ya ki yutip wa bakla wa ki khubor hamsaya chaphang ka khlam. Ya kani ka rai da chim hadien ka yalang wa pynman lyngba ka Internet ha u Zoom wa da pynman ha ka 8 tarik uni u bnai wa khut pynman da u Principal Secretary, Health & Family Welfare Department. Da wan wow chimbynta da palat 150 ngut kiwa yahkhmat seiñ niam na kylleiñ ka jylla.
Kiwa chimbynta kynthup ki ya u Bishop Jose na Tura, Pastor Ruddy Kharkongor, Fr. James Anderson Syiemlieh, Pastor Stephan Pradhan na Ri Bhoi, Rev. HCT Sumer na Jowai, President ka ABDK, Tura, Fr. Richard Majaw, ka Angela Ingty, Rev. S.R Dkhar, KJP Assembly, Pastor Nicky Sangma, Rev. Shanlang Warjri, Rev. Aminot Sohliya wa Rev. K. Dkhar na Jowai wa u Naba Bhattacharjee, President ka Central Puja Committee, Shillong wa u Noor Nongrum na Shillong Muslim Union. Da embynta lang leh kiwa mihkhmat ki imlang sahlang kam u R.M. Blah, General Secretary, Federation of Traditional Village Leaders of Khasi & Jaintia Hills wa kiwi kiwi de.
Ya kani ka yachemlang da pynlai da u Sampath Kumar, IAS, Principal Secretary, Health deiwa emlang ki Deputy Commissioners na kiwa boon ki District wa ki sahep ka DHS, NHM-Meghalaya waka WHO.
Kamwa 70% na ki seiñ niam da ong ki wa da sdang ki wow leh yeiwa emkaam hajrong kani ka thong katwa 30% won ong ki wa kwah hi wow leh tangwa ym tipsap ki kammon wow leh dei rukom wa biang.
Ha ki thaw wa em cha jngai cha kdong cha chmiang ka Meghalaya heiwa ki bru ym em ki ya ki Smartphone wa Internet, ha kam kini ki thaw, ki thaw yachem wow maneblai ye ki wow pynman kam ka rynsan wow e yutip chaphang ka khlam wa i tika yada na ka khlam.
Ha ini i yaklam da chem wa boon ki bru ngait ki wa manda chim yei tika daw yah ko chei yap, daw dooh khon wa kiwi de ki chah ktah iwa da pynartatien wei pyntieñ ya ki paidbah, kamtæ da emkaam wow pyndooh ya ini i sñiawthooh bakla.
