I kynaad hapyrdi ki Karbi na Tahpat wa ki Pnar na Lapangap da sdang i nadooh ki kajiak snem wa da lai heiwa kat dang mih ki snem dang joor i.
Ha kani ka kynti won dapoi chei pynthut ki Karbi ya ki Pnar wow ah kba ki ha Lapangap heiwa dapoi u pood wa yap uwi u Karbi uwa na na Tahpat.
Ynne ka sngi hawa yaklam wa u waheh chnong ka Lapangap, u Deimonmi Lyngdoh da ong u wa da yaklam neipor cheipor hapoh ka dorbar chnong wa kwah ko yei yasuk kamwa jooh man nachwa.
Da ong u wa i yasuk lada klam ha iwon iwon i thaw ha ki Committee da man ki kiwa smat tangwa ki Karbi ymtoh u booh ki da ki kyndon ya ki tangwa i klam u man i du hajrong i chongsuk donhi wei lada booh ki da ki kyndon neiliang yong ka Lapangap katwa man ymye ki wow pdiang yeini.
Kam wow kdaw heini wa ha ka 6 tarik uni u bnai da em ka yalang hapyrdi ka Dorbar Chnong Lapangap wa ka Socheng Amreng Border Development Committee (SABDC) ha BOP ka Assam ha Khanduli heiwa da em ki sahep na ka West Karbi Anglong District Assam wa ka ka West Jaiñtia Hills District, Meghalaya.
Ha kani ka yalang ka SABDC da booh ko ya ki le tylli ki kyndon kiwa kynthup wow chah biang wow thung dieñ ha Loom Pynthor ka Lapangap, wow leh ya ki kot ki sla namo Register ya ki thaw cha Assam wei wow chah u thung ya ki moo pood yow chah ya ki Lapangap u ah kba deiwa suk khlem chah pynthut.
Discussion about this post