Haka lai paidbah namo ka Rally wada khut pynman da ‘Ka Sur ki Nong War Jaiñtia’ ynne ka sngi ha Amlarem, Civil Sub-Division, West Jaiñtia Hills District, hajrong i chah siat yap u Cherishsterfield Thangkhiew haka 13-08-2021. Kiwa yahkhmat da beiñ ki yaka sorkar MDA deiwa ong wa ka toh ka sorkar leh embor ya u khian u nai, neibhah hadooh kattæ ym pu em kem ya kiwa emkti u siat yap ya u Thangkhiew, najrong wa dawa haroh ki yei bichaar wa hok.
Haka yalang wada pynman ha Enowel Hall Amlarem wa pynlai da u Convener ka ‘Sur ki Nong War Jaiñtia’ u Tohmondiam Mukhim; u Tenderson Lymba uwa na Shnongpdeng da kynthah joor u ya u Lahkmen Rymbui deiwa ong wa oo toh uwa dai jaitbru.
Da khana u wa dang kynmoo u wa heipor wa u Lahkmen Rymbui dang man u kam u General Secretary ka KSU War Jaiñtia Circle, khut u ya ki khynroo wow tei yaka imlang sahlang wei u yakhun neibynta i daw bah yong ka ri, ka jaitbru. Kamtæ hawa da jia kamni, booh u i kylli wa ym toh oo mo wa emkti, wei lym toh oo weileh wym em pynchitom u ya kiwa emkti.
“Cheiwon u Home Minister wa emburom, katni wa da poi u haka chuki chet kylla u yaka ri waka jaitbru, ym toh mo uwa da chet kylla ya ka ri waka jaitbru,” da ong u Tenderson uwa jooh man dkhot heipor wa ksoh GS u Lahkmen.
Kawi ka manbei ong ko wa hei sñiaw yong ka, ini toh i yatylli lang u Montri Rangbah, u Montri ka chnat Kaam Pohyung waki pulit.
Da ong haroh ko wa yoosar wymtoh i mynsien bru itu wa da yap, kopsar i mynsien bru toh du u pulit wa siat yap ya u Cherishsterfield.
“Kitu ki pulit da man kordor ki hakhmat u Conrad wa u Rymbui, katwa kiwi won ym em kordor ki, man ki kam u dieñ wa chna da u thri donhi, lada ki leh toh hi ka mynsien wa chna da u Blai waroh toh u ya sñiawsih lang ki yei jia ha Mawlai,” pynrap ka manbei.
Heijooh i por ong haroh ong ko wa kani ka sorkar toh ka wym em burom, neibhah la toh kawa em burom da toh u kem ko ya kiwa pynyap bru.
Kiwi won wa e i klam kynthup ya u Yoodahunki Shylla, Convener ka Sur ki Nong War Jaiñtia, i klam na u waheh chnong Amlarem u Kampher Pohlong, na u Shlur Mukhim uwa na Padu wa kiwi kiwi.
