Ki ar ngut ki Montri Rangbah, kitæ u Conrad Kongal Sangma wa u Himanta Biswa Sangma da yachem ki wow ya syllok kammon wow pynlai chakhmat ya ki kaam pynbait pood hapyrdi ka jylla Meghalaya wa Assam ynne ka sngi ha Shillong.
Hawa klam wa kiwa thoh khubor, u Himanta da ong u wa i yachem toh du wow ya syllok yei lai ki kaam yong ki Regional Committee wow pynbait pood neidaw wa em u ha Shillong ynne ka sngi wei da pynsñiaw u wa ympu toh won wow yaklam pynbait næ wow chim yei rai. Da ong u wa ka yalang neibynta wow chim ya ki rai daw man ha ka tayaaw wa nyngkong næ wa-ar yong u Naichiphaw wow wan.
Da ong u wa i yaklam toh wow wanrah chwa yei sñiaw chngaaiñ wei chaniah hapyrdi ki paidbah kini ki ar tylli ki jylla khnang wa i ya pynbait pood u man ko da ka luti kawa sñiawsuk lang ya waroh ar liang.
Da ong u wa ki ar ngut ki Montri Rangbah ym kwah ki wow lai pait ya ki khappood du wow pyndep rukom iwa daw wanrah won yei kynaad hadien weiwa ki paidbah u pynbaad kylla ki leh ya ki wa wan pynchit ki.
Kamtæ da ong u wa chisien wa lai pait, ki paidbah toh u ya chongsuk kynjai deiwa sñiawsuk wei wow pdiang sñiawbha da ki dur wa kmen.
U Montri Rangbah ka Assam da ong u wa ki 6 tylli ki thaw wa ya kajia pood yow pynbait ha ka wat wa ar man ki kiwa rap jwat, tangwa waroh ar jylla daw pynbait ki hei rukom wa jai jai. Hei jooh i por u Himanta da kyntu u ya ki paidbah ha khappood wow pynneh yei suk i saaiñ ha ki thaw wa em ki wei wow sñiawthooh wa waroh ar ki sorkar kreh chitom ki wow pynbait ya ki khappood wei ki Regional Committee leh da lai bha chakhmat i kaam ki wei da em leh kiwa da ye wow ya mynjur lang wow pynbait.
U Himanta Biswa Sarma da poi u cha Shillong ynne ka sngi kam u kongsan wow wai ya u mooyurim ka Hostel yong ki khynroo khyllood wa lai puræ ka Karbi ha Laban, wei ha kani ka yalang da emlang leh u Montri Rangbah ka Meghalaya u Conrad K Sangma.
Discussion about this post