I thmu wow pynkrehkaam ya ka Common University Entrance Test (CUET) neibynta ki khynroo kiwa kwah wow lai puræ ha ki skurbah wa seiñ da ka sorkar pyrdi dang sah hei wym che ya kiwa boon wot ya kiwa sikai kamjooh ki Principal yong ki College kiwa em hapoh ka jylla.
Yow yatai sani bha yei pynkrehkaam ya ka CUET, ynne ka sngi ka chnat puræ puthi ka jylla da lum ko ya ka yalang hapyrdi ki bor pynlai ka North Eastern Hill University (NEHU) heiwa da emlang da u Vice Chancellor, u Prof. Prabha Shankar Shukla, ki Principal yong ki College waphær waphær ka jylla wa ka chnat puræ puthi yong ka sorkar jylla, wei da wan chimbynta da u Montri ka chnat Puræ Puthi ka jylla, u Lahkmen Rymbui.
Hawa kylli hajrong katai ka yalang, u Prof. Prabha Shankar Shukla da ong u wa ya ka CUET daw pynkrehkaam bait ha ka jylla, wei i eh wa em ha ini i pynkrehkaam ya ka CUET daw ya chong wow ya phyllu bniah kammon u pynbait.
U Public Relation Officer ka NEHU, u Dr. Davidson Pyngrope da ong u wa ka rai na ka chnat Puræ Puthi ka jylla wa naka NEHU toh wow lai chakhmat yow pynman ya ka CUET, wei man iwa emkaam ya ki kynnah wow yakhun ya kani ka Exam neibynta wow yoh puræ ha ki College kiwa em hapoh ki skurbah ka sorkar India. Da ong u wa ini i ymtoh i kwah yong ka NEHU, tangwa toh katkam wa phah yong ka University Grants Commission (UGC) wow pynlai ya kani ka Exam da ka National Testing Agency (NTA).
Neiliang u Principal ka Union Christian College (UCC), u Dr. R.M. Manih da ong u wa neiliang ka NEHU kwah ki wa ki Higher Secondary u hap ki wow yakhun ya ka CUET yow yoh puræ rap chajrong. Da ong u wa ya katni kiwa boon wa lang ym pu sñiawthooh bha ki khamtam ha ki thaw palatsor wei i por da duna palat i.
Hajrong i pynbiang ya kiwa emkaam, u Principal ka Synod College, u Dr. R.M. Lyngdoh da ong u wa neiliang u Montri da pyntikna u wow pynbiang ya ki kor Computer ha man ki District wa em ki Center wow yaleh Exam.
