Ka HANM Narpuh Circle da pyntip ko wa kiwa chong chnong wa ki khon khynroo ka thaaiñ deilang waka Wahiajer Narpuh Social & Sport Club kawa haap hapoh ka East Jaiñtia Hills District da wan ki wow pynsñiaw hakhmat ka seiñ yei pyrchah joor ya ka Public Hearing ka Meghalaya Cement Ltd kawa tip leh kam ka Topcem Cement kawa da khut pynman da ka Meghalaya State Pollution Control Board (MSPCB) ha kani ka 24 tarik.
Kani ka Public Hearing toh yow pynheh ya kani ka karkhana kamjooh wow pynheh yei bor pynmih Clinker naka 2600 TPD (0.858) cha ka 4500 TPD (1.485) deilang waka 10 MW Captive Power Plant waka 9.5 MW Waste Heat Recovery System (WHRS).
Ka seiñ da ong ko wa ini i thmu kani ka Company daw ktah bha ko ya kani ka chnong Wahiajer Narpuh neibhah em ko du kamwa 500 Meter na ka chnong wei kamjooh leh ya ki chnong wa em cha jan wei ka seiñ da ong ko leh wa i em kini ki Cement Plant ym em pynmyntoi ko iyi iyi tangwa da wanrah sa du i jæd suda.
U President ka seiñ, u P. Syiemlieh da ong u wa nachwa ka thaaiñ Narpuh toh kawa yirngam kawa pynngaad wa jngiar ki um ki wah, ka la-ær wa khooid wa ki khloo leh toh kiwa rben tangwa nadooh wa wan kini ki karkhana pynmih khyndaw-bilat da man ko kam ka thaw noh jhep.
Da ong u leh nadooh ki um ki wah, ka la-ær ym man de ki kiwa biang næ kiwa khooid wei ki kjut leh mih kiwa har rukom kiwa hap maad da kiwa chong chnong najrong itæ wot ki mar rep leh ym man de ki wei ki khloo leh da syllen lut ki.
Kamtæ ka seiñ da ong ko wa ini da wanrah ko yei dooh nong bha ya ka thaaiñ neidaw wa da jæd da pra wei hadooh katwon u e laad chooh chooh ya kini ki karkhana Cement khlem da pyrkhat de ya ka mynried ka mankawi, kamtæ ka seiñ hajrong kani ka yurim da yieñ skem ko wow pyrchah joor ya katai ka Public Hearing.
Discussion about this post