Ka Rupda RY Lato (22 snem) kawa na chnong Jowai da yoh ko wow mihkhmat ya ka ri India ha ka yakob miat kynthai wa tip kam ka Miss Aura International kawa daw pynman ha Antalya, Turkey nadooh ka 17 tarik u Naikhynde hadooh ka 1 tarik u Naichiphaw uni u snem.
Ka Rupda Lato toh kawa man leh kam ka Fitness Trainer, kawa thoh wa taar, ka Actress wa kawa ka’it bha yei riam i bait wei da chah jied ko hadien wa pyndep ya kiwa boon ki rukom jied wa ki Interview.
Ka Rupda Lato toh ka khon u Riquoma Rq Laloo waka Yoobina Lato kiwa sah ha Dulong, Jowai wei da man ko leh kawa nyngkong napoh ka Meghalaya wow yoh ya ini i naam wow mihkhmat ya ka ri India wei da man i leh i sarong ya ka chnong Jowai kamjooh ya ka jylla Meghalaya.
Ka Rupda da yoh ko wow mihkhmat ya ka India deiwa jop ya ka Rubaru Miss India Elite wa da pyman ha Goa ynne ka sngi.
Da wan wow pynkup pangsnget ya ka da ka Rubaru Miss India Elite warim, ka Nakita Tania Fernandes deilang wa kiwa jop yei naam Rubaru Mr. India, u Chena Ram Choudhary, u Nehal Patil wa u Shubham Kotharkar.
Kajiak chaphang ka Rupda:
Ka Rupda RY Lato ka khon ka chnong Panaliar, Jowai kawa chong wa sah ha Kdohhati Dulong, Jowai kawa man ka khon khaddooh yong u Riquoma Rq. Laloo wa ka Yoobina Lato. Da pyndep ko ya ka ICSE (Class X) na Mount Hermon School, Darjeeling katwa ya ka CBSE (Class XII) na Axel Public School Lokhra Kamrup Assam. Da lai puræ ko cha Dehradun ha Dolphin Institute of Medical Science, tæ jia noh wa wan ka khlam COVID-19 da liwan yung ko ha u snem 2020, neitæ da pteiñ biang ko ya i lai puræ yong ka cha Bengaluru ha Ramaiah University.
Kam ka khynnah khyllood wa ka-it wow pynmiat ya i doh i pran, da puræ ko ya ka Body Fitness, kawa ka hi da jooh em ko ya u Youtube Channel yong ka, wa khut ko ‘Fit With Rupda’ na uni ka channel da e sikai ko ya chiboon kiwa kwah u chah sikai. Daman ko leh kawa sikai Body Fitness ha Bengaluru.
Ka Rupda nadooh dang 4 snem i rata yong ka, da ak ko ya ka phlim wa nyngkongdooh ha pyrda heh (Big Screen) wa pyrtuid Man Isa wa pynmih da ka Yaman Creations. Da ak ko leh ya kiwi ki phlim wa ki sur kam ha ka Lasyntem wa ka Saphika, neitæ daman ko ka Main Role ha ka phlim khynnah wa nyngkong ha Meghalaya, wa pyrtuid Hamkheiñ Ke wa pynmih da ka Yadalada Film Production Pvt Ltd wei wa Direct da u Wanchema Laloo.
I ka-it ka Rupda nadooh ki por wa dang khian, dang lai skur ko ha North Liberty School, Jowai toh u thoh ya ki parom khian dei ktien pharæng. Da pynmih ya ka kot ‘Lie & Lost’ heipor wa dap ko 11 snem i rta, heiwa da yoh yaroh ko na kiwa boon walang kam kawa thoh khot khynnah wa nyngkong jan hapoh Meghalaya.
Man ko kawa sñiawsuk u ya chimbynta ha ki kaam yalehke hapoh chnong poh thaw nadooh ki kaam Sports hadooh ki rwai. Daman ko leh kawa rwai hapoh ka All India Radio Jowai.
Dang dep man ko kam kawa bichaar (Judge) ya ka Miss, Mr & Mrs Goa 2023 heiwa ka hi em ko ka thong katni wa kammon u kyntu kynrong ya ki kynthai yoh ki u man kiwa em katæ ka bor pyrkhat ha waroh ki liang, nadooh i chait i tram wot ki kaam yung kaam sem leh i jooh.
