Ka mukotduma PIL ha ka High Court ka Meghalaya wa da yaleh heiyatoh wa ki karkhana Coke kawa da sangeh chwa ini wa dep hadien wa da dep wow pynmih hukum ka NGT, da chim wow bichaar biang yaka ynnin ka sngi hadien wa da phah ka NGT wow khang ya kitu ki karkhana kiwa da krehkaam khlem da yoh bor wei khlem da bood ya ki kyndon ka Meghalaya State Pollution Control Board (MSPCB).
Neiliang ka sorkar jylla da e jubab ko wa da pynkreh yaka ‘Action Plan’ katkam ka hukum ka NGT wei da dep wow leh yeini heiwa daw pynkrehkaam noh hapoh chi bnai. Kam wow kdaw heini, ka NGT ha u Naiynñiaw 2022 da phah ko wa waroh ki karkhana hap ki wow bood yaka hukum ka MSPCB kawa da pynmih haka 23-12-20 hanla man ki kiwa da yoh bor chwa kani ka tarik. Heiwa ka NGT da klam che ko wow pynkreh da ka ‘Action Plan’ hapoh soo bnai wa pynmih ya ka hukum iwa da kut por ha u bnai Khonchonglad (Nov) 2022.
Kamtæ ka High Court da ong ko wa ini i pynslem da pynyoo wa ka sorkar da tyngkheiñ ko yaka hukum neibhah kattæ da tam soo bnai.
Da phah leh yaka sorkar wow chimkhia ko yaka hukum wa phah wow su cha kitu kiwa chah ktah nei em kini ki karkhana.
Ka High Court da klem ko leh chaphang u mooyong wa da pynemkaam ha kini ki karkhana deiwa ong wa man u u mooyong wa tih pyrchah yaka aiñ neibhah ym em wa yoh License wow tih mooyong hapoh ka jylla hadooh kani ka sngi.
Hajrong ini, da phah ya ka sorkar wow thooh ko neiwon poi u mooyong ym du ha ki karkhana Coke tangwa ha ki Ferro Alloy Plant kiwa boon leh da krehkaam pyrchah yaka aiñ hapoh ka jylla.
U muktiar ka jylla da pyntip u wa da kiwa da lai rah cha Supreme Court yow pyrchah ya kani ka hukum ka NGT tangwa ym pu em won e hukum ka Supreme Court.
Ya kani ka mukotduma daw chong bichaar biang daka High Court haka 27-02-23.
