Jowai : I sur ki paidbah boon ki por toh iwa eh bha u bichaar wei wow sñiawthooh, ka nongmuna man ko hei yatoh wa u Deputy Commissioner ka West Jaiñtia Hills, Jowai.
Lada wyrchaw nadooh wa pynmih khubor u Arunkumar Kembhavi wa da chah kyrriah kaam u na West Jaiñtia Hills District cha West Khasi Hills ha ka 2 tarik uni u bnai lyngba ka Facebook Account yong oo kawa tip kam ka Deputy Commissioner Jowai, da sakhi wa da jan poi 900 tylli ki like wei kiwa comment won da poi 400 tylli hadooh ynne ka sngi.
Ki lok Facebook u da poi 5000 ngut iwa man i pood wa chah ka Facebook wow pdiang ya ki Friend Request.
Ha ki comment, waroh da yaroh ki yei kreh wa ki kaam wa leh bha u DC wei da kyntu ki leh ya ki seiñbhalang yow leh ki yeiwa emkaam yoh pynneh ya uni u DC wei em leh kiwa kular wow leh ki katwa ye yow pynneh ya u DC yow pyndep u ya ka 3 snem kamwa da toh i hok yong oo.
Ynne ka sngi ka seiñ MPUF da khut ko ya waroh wow ya emlang ha ka yalang paidbah yow ya pyrkhat ya ini i waroh tangwa, da wan ki manbei kiwa boon na ki toh ki wym tip ka ka tæ ka Facebook, yow kyrchaan pynneh ya u Arunkumar Kembhavi kam u DC.
Ha ka yalang da pynman, da boon da ki pulit hadooh da em ka kari Fire Brigade ka wa da pynkhreh boi wa daw mih iyi iyi i awri awra ki paidbah. Hawa pait bha da chem kamwa da boon da ki pulit ya ki paidbah wa wan cha kani ka yalang.
Ha kani ka yalang, ym em wa kwah i u ong namo wow kadaw kti ya uwon uwon, tangwa da khleh lang ko ya waroh, deiwa ong wa ha iwon iwon i eh i khoo wa chem ki paidbah waroh sñiawhun i wow krai ha ki dukan cha, dukan ja wa ha pyrdi ki lok ki jor.
Ini waroh yoosar wa boon ki por i yoh myntoi yong i hi samen toh iwa kor dooh, ya kiwi katwa yah ka bok ka nasib yong ki hi.
Kynmo wa lada ym ku lang waroh, samen i ym ye i u ku nei bynta ka jait bru ka yong i.
Discussion about this post