U SDO (C) ka Amlarem Civil Sub-Division da pyntip u wa hadien wa em i pyrchah yei pynemkaam yei thaw noh-jhep ha Mynkjai neidaw wym biang i rukom leh ka Jowai Municipal Board (JMB) yei jhep i wym toh deiwa bood ya ka juk kawa katni ha ini i thaw.
Kamtæ ha ka 2 tarik uni u bnai u DC ka West Jaiñtia Hills District da khut u ya ka yalang wa kynthup ya ki chnong wa em chajan ka thaw noh-jhep heiwa da chim ya ka rai wow chah u pynemkaam ya kani ka thaw noh-jhep da ka JMB hadooh wa yoh thaw da iwi iwa ym chim por palat 6 bnai.
Hajrong ini da phah ya u CEO ka JMB wow pait yow pyntikna wa yei jhep da noh hei rukom iwa biang.
Ha ka yalang wa bood won kawa pynman ha ka 6 tarik uni u bnai, kini ki Dorbar Chnong won da rai ki wow pyrchah i pynemkaam ya ini i thaw noh-jhep hanla du chipor donhi leh.
Neiliang u SDO da ong u wa ym em artatien yei pynkhreh yei thaw noh-jhep wa thymme da ka JHADC deilang wa u Montri ka chnat Urban Affairs kiwa da kular leh wa da booh hakhmat dooh wow pyndep ya ini i kaam.
Kamtæ da pynmih hukum deiwa pyrkhat wa ye wow em kiwa pynthut yei chongsuk wa i chngaaiñ ha ka imlang sahlang deiwa pyrchah yei noh-jhep hanla iwa du chipor leh, da pynkrehkaam noh da ka Section 144 CrPC yow pynbna ya kini ha wah:
Ym chah wow pynman ya ki yalai paidbah, ki yalang ki bru palat 5 ngut, i rah ya ki tiar yasiat lane kiwon kiwon ki tiar pynmynsoo nadooh ki dieñ wa ki moo ha ki thaw wa em hajan kani ka thaw noh-jhep ha Mynkjai.
Da phah ya u CEO, JMB wow pyntika wa ka aiñ Solid Waste Management Rules 2016 wa da pynkrehkaam da ka Ministry of Environment, Forest & Climate Change ha ka 08-04-2016 toh kawa da bood thij heipor wa noh-jhep ha Mynkjai yow pynhun yeiwa sñiawkhia kiwa chong chnong wa noh khlemakor yei jhep dei wym em bood kyndon.
Kani ka hukum toh kawa krehkaam nadooh myntu ka sngi hadooh wa pynmih hukum da kamwi.
(Feature Image-Archive Photo)
