U Dr. Tedros Adhanom Ghebreyesus uwa man kam u Director General ka WHO da ong u wa Omicron ym em da yoo wa ktah joor u kamwa ktah u jait Delta u COVID-19 tangwa ym ye won wow kheiñ u kheiñstiñ ya oo namo wow booh ya oo hapoh ka ‘Mild Category’.
Yeini da ong u deiwa kdaw wa ha kani ka tayaw wa dep da em boon dooh kiwa yoh COVID-19 nadooh wa sdang ka khlam wei u Omicron da yoo wa duna i ktah u khamtam ha kitu ki thaw wa da em boon kiwa da yoh tika kamtæ da emkaam wow yoh tika salonsar yow ye biang u im ka khayi pateiñ.
Da ong u leh wa ki Hospital da man ki kiwa da khynnia wei duna ki bru wakreh iwa da ktah kylla leh ya kiwi kiwa emkaam sumaar jhan ym du kiwa yoh COVID-19.
Heiyatoh wa i krehkaam i tika, da ong u wa ki tika wa da em katni hanla ym ye ki wow yada ya waroh nei yoh ya uni u khñiang tangwa da yarap ki yow lait u hap thiah Hospital kamjooh wow yada nei yap.
Da pynkynmoo u leh ya ki bru wow deiñ ya ki Mask wa tymmoh bha yei khmut wei ktien, u yait na ki thaw wa boon bru iwa man kam ka laad khanglaad yei poor ka khlam.
Da ong u leh wa da em ki ri kiwa da ye wow e tika hadooh soo sien uwi u bru katwa kiwi ki ri ym dap tika ki wow e tang ya kiwa kreh hei chait i khiah deiwa pynrap wa hanlada da em ki ri wa ye wow e tika pynkhlan tangwa ini ym ye ko wow pynkut ya ka khlam lada kiwi kiwa boon ki ri ym ye ki wow yoh tika, kamtæ da emkaam wow pynkylla yeini yow pynkhreh leh lada em biang kiwi ki jait khlam ha ki por wa daw wan.
Kam wow kdaw heini wa ka dawbah Europe da man ko kawa da chah ban biang ha ka khlam heiwa ha ka 3 tarik uni u bnai ha USA da em 10 lak ngut kiwa yoh COVID-19 ha chi sngi.
Ka WHO da ong ko leh wa u Omicron kamwa da chem hadooh katni wym em waræ lane chitom joor kiwa yoh ya oo ha kiwa dang khynroo kamjooh kiwa da heh rta.
Da ong leh wa daw em 109 tylli ki ri ki wym poi cha ka thong wa da booh ka WHO wow em 70% na kiwa chong chnong kiwa yoh tika pura.
