Shillong: U Montri ka sorkar jylla u Kyrmen Shylla uwa man leh u MLA ka UDP na Khliehriat da ong u wa ka seiñ Hynñiewtrep National Liberation Council (HNLC) ym em hok ko wow khrong dan na ki Company næ ki karkhana pynmih khyndaw-bilat kiwa em ha ka thaaiñ. U MLA da kyntu u leh ya ka HNLC wym toh u leh yaki kaam pyntieñ neibhah man ko i dooh burom ya kiwa chong chnong ka jylla, wei da pynrap u wa lada ka HNLC ong ko wa ki Company ym em e kaam e jaam ki ya ki bru yong ka jylla, toh iwa bakla chiboon.
Da ong u wa waroh ki karkhana pynmih khyndaw-bilat næ ki Company waphær waphær ym du ha jylla, hadooh ha ka pyrthai waroh kawi su ki ya ka dan wa toh u su ki wei toh lyngba kani wa ki da ye ki wow krehkaam, wei da ong u leh wa lada ki toh ki seiñ wa sakhiat (Genuine Group) ki ye ki wow wan cha ka sorkar wei wow paan ya iyi wa ki emkaam ki, ym toh da iwa pyntieñ ya ki Company kiwa wan kreh wei e kaam ya ki bru ka jylla.
Da ong u wa kamwa man katni, ka sorkar samen ym ye ko wow pynbiang kaam lut ya waroh, hanla boon kiwa pep skur chiteiñ por, boon ki khynroo kiwa ym yoh kreh wei lada jia kamni, ki yi wow chah pynbaad næ ki wow chim yei kitkhlieh.
U Kyrmen da ong u leh wa ki Company ki hap ki wow thung ya ki bru ka thaaiñ katkam ki soskular wa da yasoi wei lada jia wym leh næ bood katkam ka soskular wa da soi, ka sorkar ka em hok ko wow pynchitom ya kam kini ki Company.
Hawa yatoh wa i pynpdung bomb ha Star Cement ya iwa da kam da ka seiñ HNLC, u Kyrmen da ong u wa da dep u wow yaklam wa u SP ka East Jaiñtia Hills yow thooh yutip kawa bniah hajrong ini wei katni ym pu ye wow ong iyi iyi leh neibhah wa hap emkaam wow tip ya iwa sakhiat khamtam ileh wa da jia kamni wei iyi i daw wa da pynman wow jia kamni tangwa da ong won u wa man iwa embhah wa ym em jia iwon iwon iwa sñiawsih næ i dooh noh ya i mynsien bru.
