U Chanki Langbang uwa da chah jied ynne ka sngi kam u Dolloi wa pura ka Elaka Shangpung, hawa klam cha kiwa thoh khubor da khana u wa jooh klam u chaki paidbah ka Elaka, “Jied ya nga dei maya nga leh u yakrehlang O waphi dei maya, jied yanga dei burom nga leh u yakrelang O waphi dei burom”. Kamtæ heiyatoh weini i jop yong oo leh kular u wow yakrehlang waki paaid ka Elaka kamwa da jooh pynsñiaw u cha ki.
“Kamwa ka chap yong nga toh ka sngi, ka sngi wym ñiaw chiliang ko ya waroh kiwa em ha pyrthai, nga leh kamjooh kam uwa da chah jied pura, hajrong kani ka jooh ka yurim u e O yei chakri neibynta u skem i khyndaw u chyiap lada du chi kham chi troh leh,” pynrap u Chanki Langbang.
Heijooh i por khana u wa jooh ong u yaki paidbah, wym em kwah u wow yaman lok du chi sngi donhi tangwa u neh i warom chirta hapyrdi kynthai wa chynrang.
Hawa yatoh wa i thong krehkaam, da pyntip u wa da booh hakhmat dooh ya u pood u ang yong ka Elaka neibhah hadooh kamwa man katni, ym pu man uwa bait lane uwa skem. Heijooh i por leh ya ki dienkjat u longchwa wow pteiñ wow sikai.
