Uwa yahkhmat ka BJP uwa man leh u MLA na Pynthorumkhrah, u Alexander Laloo Hek da ong u wa man u uwi na kiwa mihkhmat wa pyrchah yei tih wei khayi pyrchah aiñ ya u mooyong wei da dep ong u leh wym man u leh ya iwon iwon i wym man.
Da ong u wa sñiawkmen u wa u Symbood Montri Rangbah, u Prestone Tynsong leh pyrchah u ya ini, wei em leh ki Montri ha ka sorkar wa kynthup ya u Banteidor Lyngdoh, u Hamletson Dohling wa u MLA u Samlin Malngiang leh pyrchah ki.
Da pyntip u wa hajrong kani ka phang da chong yalang leh boonsien wa u Prestone wei da yachem leh ya u Montri Rangbah wow pynsñiaw wa ki pyrchah ki ya ki kaam wa man pyrchah aiñ, tangwa kiwa leh ki leh ki wei hadooh katni ym ye wow khang ya kiwa kreh mooyong pyrchah ya ka aiñ.
U Hek uwa man u Montri warim ha ka sorkar jylla da ong u wa kam uwa mihkhmat kiwa emlang ha ka sorkar, ki pynyoo bait ki man-i-por wa ki pteiñ ki wow pynyoo yei wym hun ya iyi ka sorkar da leh ko.
Hawa kylli wa hajrong kini kiyi kiyi kiwa dang neh dang sah kamjooh, da ong u wa lada ym chong lang hajooh pynyoo wa leh Politics wei lada chong lang hajooh ye wow pynyoo wow leh ya iwon iwon wa toh.
