U President warim ka Hynniewtrep Youth Council (HYC), u Robertjune Kharjahrin hadien wa suba kiwa boon wa daw psiah noh u cha ka ki kaam saiñhima, ynne da pyntikna yeini heiwa da pynbna wa daw psiah noh u cha ka UDP.
Ki khubor ini wa dep da ong wa u Robert da paan Ticket u naka UDP yow yakhun MP Election naka Shillong Parliamentary Seat.
U Robert Kharjahrin daw psiah u myntu cha ka UDP ha ka yalang wa daw pynman ha Mawkyrwat.
Ini da man leh kam ka dak wa daw pynyieñ hi ka UDP da u Robert heiwa da yoh u leh yei kyrchaan na kiwa boon ki MLA wei da em wa ong hadooh u President ka UDP, u Metbah Lyngdoh leh kyrchaan u ya u Robert.
U Robert man u leh kam u muktiar wei da ieh noh u yei man kam u President ka HYC ha u bnai wa dep yow psiah noh ka ki kaam saiñhima tangwa dang man hi u kam uwa e buit ka HYC.
Kiwi de ki pyrtuid wa da mih ini wa dep kiwa kwah wow yakhun MP naka UDP toh u President ka Khasi Author Society (KAS), u DRL Nonglait wa u MLA warim ka Mawlai, u Process T Sawkmie.
Kam wow pynkynmoo wa ini wa dep da em leh i thmu wow pynyieñ du uwi u kyrtong uwa da hunlang da ka UDP waka HSPDP kiwa em hapoh ka Regional Democratic Alliance (RDA) wei neiliang ka HSPDP da dep pynsñiaw ko yei kwah wow pynyieñ uwi donhi u kyrtong wei bien ko wow ya krehlang waka UDP.
Discussion about this post