Deiwa pyrkhat ya kiwa dooh wa duk ha ka imlang sahlang, ka Union Cabinet wa chongknor da u Prime Minister, Narendra Modi da rai wow pteiñ wow e ya u khoo rachon wa saam mynkna wa tip kam u khoo Pradhan Mantri Garib Kalyan Anna Yojana (PMGKAY) Scheme sa chi 6 bnai itæ hadooh u Naikhynde (Sep) 2022 kawa man le kam ka sien wa ynru (Phase VI) wa da pteiñ yeini.
Ka Phase-V ka PMGKAY Scheme daw kut ko ha uni u bnai. Kam wow pynkynmoo wa ya u khoo PMGKAY da pynkrehkaam nadooh u Naitung (Apr) 2020, kawa da man leh kawa heh dooh ka e yarap pyndap baam hapoh pyrthai.
Yow leh yeini, ka sorkar da dep ko wow pylut kamwa T. 2.60 lak klur wei daw pynlut chooh sa T. 80,000 klur ha kini ki 6 bnai wow wan hadooh u Naikhynde 2022 iwa da mut wa hapoh ka PMGKAY da pynlut awjan T. 3.40 lak klur.
Ini mut i wa kiwa yoh myntoi daw em ki kamwa 80 klur ngut ha kylleiñ ka India.
Ka sorkar da ong ko wa hanla ka khlam COVID-19 da duna bha ko wei ki kaam khayi pateiñ leh da sdang biang ki kamwa jooh, tangwa ka sorkar ym kwah ko wow em kiwa dooh wa duk wow chah ktah ha kini ki por wa sdang ki khih ki khan wow im biang.
Hapoh ka PMGKAY kiwa da em Card Ration da yoh pyntam ki sa 5 kg u khoo mar uwi u bru chi bnai hapoh ka NFSA iwa man awjan archah na iwa da jooh yoh ki.
