Hadien wa pteiñ i ku kiwa chah ktah ha ka khlam COVID-19 ha waroh kawi ka jylla, neiliang ka sorkar da rai ko wow pynkrehkaam biang ya ki kyndon wow khoom u kdoh namo ki Containment Measure wow sdang nadooh ka 7 tarik uni u bnai.
Katkam ka hukum da rai wow pynkrehkaam ya ka Lockdown ha waroh kawi ka jylla nadooh i step 5:00 waje ka 7 tarik hadooh 14 tarik i step 5:00 waje.
Da khang ya waroh ki jait yalang paidbah, i psiah kiwa uiñke suwari kiwa na baar jylla wa waroh ki thaw uiñke suwari.
Da khang yei lai na kawi ka jylla cha kawi tangwa ym em khang ya ki kari wa lai lyngba ka jylla kam cha Asssam, Tirpura, Mizoram wa Manipur.
Heiyatoh wa i emkaam ki chnong ki thaw, ki Deputy Commissioner, ki SDO (Civil) u leh ki yeiwa emkaam deiwa pynmih ya ki hukum neipor cheipor yow pynyoh ya ki marbaam mardih wa emkaam.
Da chah ya i leh ya ka Home Delivery deiwa yoh bor na ki jar jiar ki DC/SDO (Civil) wei ki dukan Hardware u wai ki katkam wa emkaam.
Da chah yei kreh chna yung ha ki thaw sorkar wa ki yong samen lada ki mistri sah ki chithaw don deiwa yoh bor na ki DC lane ki SDO (Civil).
Ki DC da e bor ya ki wow chah chooh chooh ki ya kiwi ki jait kaam ha ki thaaiñ sor iwa chong katkam wa emkaam deiwa chah duna. Ya ini i jooh da e bor leh ha ki thaw plat sor ha ki thaw wa duna bha lane ym em kiwa yoh COVID-19.
I khayi pateiñ hapyrdi kiwi ki ri toh iwa daw pynbait da ki DC.
Ym chah wow em palat 10 ngut heipor wa pyndep ya i lehniam wa khaddooh ya kiwa da khlaad.
Da khang pyrchah ya ki bia wa kiwon kiwon ki jait yalehke Sports.
Kani ka hukum ym kdoh ko ya ki wakreh ha i chait i khiah, kiwa lai chim tika, ym krehkaam ko leh ya ki kaam wa yatoh wa i kit ya ki dawai dachin, i krehkaam ki pulit, ki chipai, Civil Defence & Home Guards, kiwa kreh ha ka Municipal, ka Fire and Emergency Service, ki kaam wa yatoh wa i bordiñ, i saam u, ka Municipal, i saam rachon, I&PR Department, kiwa pathai khubor wa kiwi kiwi ki jait kaam kiwa ymhoi de u sangeh kam ki LPG, ki Petrol Pump, MGNREGA ha ki thaw palat sor, NARI/1917i Teams, Veterinary, ki kaam rep ha ki thaw palat sor wa kynthup yei rep pathai wa u kwai wa ki kaam ri wei psan mrad wa i pynbiang baam ya ki.
Hapoh ka East Khasi Hills
Ki yung krehkaam ka sorkar jylla wa sorkar pyrdi u wai ki katkam wa da dep pynbait chwa ha East Khasi Hills. Ka SBI Main Branch, Laitumkhrah Branch wa ka Secretariat Branch wa HDFC Laitumkhrah Branch u krehkaam ki deiwa pynduna bru wakreh. Waroh kiwi ki Bank u wai ki ha ka 7 wa 8 tarik uni u bnai deiwa pynduna ya ki bru wakreh wei toh u khang ki chwa ka 4:00 waje i janmiet. Waroh ki Post Office u wai ki ha ka 9,10 wa 11 tarik uni u bnai deiwa pynduna bru wakreh.
Ha kiwi won ki District:
I wai ki yung krehkaam sorkar jylla wa sorkar pyrdi, ki Bank, ki Post Office u pynbait da ki DC lane ki SDO (Civil).
