Shillong: Kam chibynta wow yada nei poor ka khlam COVID-19 hapoh ka jylla waka ri waroh kawi, wei wow pyndooh jait yaka hapoh ka East Khasi Hills District, wei wow bood yaki kyndon ka Health and Family Welfare Department ka Meghalaya, ka District Magistrate, East Khasi Hills District da pynmih hukum ko hapoh ka Section 144 CrPC deilng waka Regulation 3 ka Meghalaya Epidemic Diseases, COVID-19 Regulations, 2020 da pynkrehkaam ko daka Night Curfew ha East Khasi Hills District nadooh ka 6th July, 2020 hadooh 13th July, 2020 neibynta i por 10:00 PM hadooh 5:00 AM man ka sngi.
Ka District Magistrate da pyntip ko wa kani ka hukum ym krehkaam ko yaki bru chipai, kiwa krehkaam hei chait i khiah kiwa leh yei kaam yong ki, kiwa dai Wholesale wa Retail Pharmacy, ki pulit, ka Fire & Emergency Service, MeECL, NEEPCO & Power Grid, Food & Civil Supplies Department, FCI, PWD, PHE, Shillong Municipal Board, Postal Service, Telecom, Communications and IT Services, Press, Print & Electronic Media, Petrol Pump wa kynthup yaka Indian Oil Corporation, ki Health Services, Hospitals, Clinics, Dispensaries, Veterinary Clinics, Labs, ki thaw chna kari kiwa da jied (Spare Parts Dealerships) yong ka Health & Family Welfare Department wa ki wakreh sorkar kiwa leh yei kaam yong ki.
Kini waroh hap ki wow bood thij yaki kyndon wow bood yaka Social Distancing, u pynduna yaki bru wakreh wa kiwi de ki kyndon ka Health and Family Welfare Department khlem pep.
Chooh chooh ki kari wa kit yaki mar wa emkaam, ki chipai, ki tiar sumaar waki thaw chna Truck wa em haki saorkbah leh man ki kiwa lait na kani ka hukum. Tangwa kiwa yah kari wa kiwa yarap yaki hap ki wow leh yaka Medical Screening katkam ki kyndon wa da booh.
Yaki Curfew Pass hapyrdi 10:00 PM hadooh 5:00 AM nadooh ka 6th July, 2020 hadooh 13th July, 2020 ye u yoh deiwa leh yaka Online Application ha www.eastkhasihills.gov.in.
