Jowai: U District Magistrate ka West Jaiñtia Hills District, Jowai da pynmih hukum u wow pteiñ yaka Night Curfew hapoh ka District nadooh i miet ka 16 tarik uni u bnai (December) hadooh wa pynmih hukum da kamwi nadooh 10 waje i miet hadooh 5 waje i step man-ka-sngi.
Kani ka hukum man ko kam chibynta wow kdoh u khoom yei poor ka khlam COVID-19 hapoh ka District, yow ye u leh yei booddien (Contact Tracing), Quarantine, ki Test wa kiwi kiwa emkaam kamjooh yow ye u bood ya ki kyndon wa da pynmih da ka sorkar Meghalaya.
U District Magistrate da pyntip u wa kani ka hukum ym krehkaam ko yaki bru chipai, ki wakreh ha i chait i khiah, ki Wholesale wa Retail Pharmacy, ki pulit, Fire & Emergency Service, MeECL, NEEPCO & Power Grid, Food & Civil Supply Department, FCI, Public Works Department (PWD), Public Health Engineering (PHE) Department, Jowai Municipal Board, Postal Service, Telecom, Communications & IT Services, Press, Print & Electronic Media, Petrol Pumps. Ya kiwa leh yaka Online Food Delivery u chah u krehkaam ki hadooh 10 waje i miet.
Ym em khang ya ki kaam wa ym hoi u dam (Essential Services) kam i sumaar sukher, ki Hospital, Clinic, Dispensary, Veterinary Clinic & Labs. Ki thaw chna kari wa kiwa dai tiar kari ki yong ka Health and Family Welfare Department, ki wakreh sorkar kiwa leh yei kaam yong ki, ki wakreh ha ki Corona Care Center, Information and Public Relations Department, National Highway waka Infrastructure Development Corporation Limited (NHIDCL).
Kani ka hukum da pynlait ko leh yei lai ki kari wa kit yaki mar wa emkaam, ki chipai, ki tiar ki tar wa yatoh wa i chait i khiah wa ki dukan chna Truck wa em ha ki sarok-bah. Tangwa kiwa yah kari wa kiwa yarap yaki hap ki wow leh yaka Medical Screening katkam ki kyndon.
Yaki Curfew Pass neibynta 10 waje i miet hadooh ka 5 waje i step nadooh ka 16 tarik uni u bnai hadooh wa pynmih hukum da kamwi ye u yaleh Online ha www.megedistrict.gov.in wa www.westjaintiahills.gov.in.
