U District Magistrate ka West Jaiñtia Hills da pynmih hukum u ynne ka sngi kam chibynta wow bood ya ka hukum ka Home (Political) Department ka sorkar Meghalaya kawa pynmih ynnin ka sngi kamjooh deiwa pait leh yei pteiñ i ku kiwa yoh ya u khñiang COVID-19 hapoh ka District, i boon kiwa yoh ya u khñiang na kiwa chah Test wei da sdang dap ki thaw sumaar, kamtæ da pynpteiñ biang ya ka TOTAL CURFEW hapoh waroh kawi ka West Jaiñtia Hills District.
Kani ka TOTAL CURFEW toh ka wow pteiñ nadooh 5:00 waje i step ka 07-06-21 hadooh 5:00 waje i step ka 14-06-21.
Kamtæ heipor wa em ka TOTAL CURFEW ym chah wow lai na kawi ka District cha kawi lait noh kitu ki kari wa lai luti cha Assam/Tripura/Manipur/Mizoram wei ym chah wow sangeh ki ha kiwon kiwon ki thaw wa em ki chnong wa em bru ha tymbud u NH-06 wa haap hapoh u pood u ang ka West Jaiñtia Hills.
Da khang leh yei lai na kawi ka District cha kawi kamjooh u lai pyn hapoh ka District. Ym chah ya kiwon kiwon wow mih cha lait lada ym em i daw wa biang. Ki kari wa mih khlem ki Pass daw chah pynchitom ki wei kiwon kiwon kiwa leh pyrchah daw ye ki u chah kem.
Da khang leh wow pynman ya kiwon kiwon ki jait yalang paidbah, ki Conference wa ki e sikai (Training).
Ym chah yei psiah kiwa uiñke suwari kiwa na baar jylla wei waroh ki thaw uiñke suwari toh u man ki kiwa khang.
Ki kaam yalehke Sport waroh toh u man ki kiwa khang.
Waroh ki thaw puræ puthi, Coaching, Training Institutes wa kiwi kiwi u man ki kiwa khang. Tangwa ha kini ki por waroh ki thaw puræ toh u e sikai ki lyngba ka Online Teaching.
Waroh ki yaw wa jooh pynman chisien chi tayaw u man ki kiwa khang.
Waroh ki yung niam wa ki thaw mane Blai u man ki kiwa khang.
Waroh ki yung krehkaam ki bru samen u man ki kiwa khang lait na kitu kiwa leh ya ki kaam wym hoi u dam namo ki Essential Services.
Ki kaam chna yung yong ki bru samen kamjooh ki yong ka sorkar kiwa em ki bru wakreh pyn hei thaw chna, kiwa ym emkaam wow wanrah bru na kiwi ki thaw toh kiwa da chah biang wow leh deiwa yoh bor chwa na u DC lane na u SDO(C) Amlarem.
Chah hi wow leh ya ki kaam E-Commerce, Courier Service, Home Delivery deiwa yoh bor na u Deputy Commissioner/Sub-Divisional Officer(C) Amlarem.
Ki dukan Hardware u chah u wai ki katkam wa emkaam deiwa yoh bor na u DC lane na u SDO(C) Amlarem.
Ym chah wow pynman ya ki bia.
Ki karkhana chna kari wa ki dukan dai tiar kari u chah u wai ki du heipor wa emkaam deiwa yoh bor chwa na u DC lane u SDO(C) Amlarem.
Waroh ki dukan wa dai khutia ya ki marbaam mardih ha ki dong ki chnong u wai ki ha ka sngi Tuesday wa Friday nadooh 9:00 waje i step hadooh 4:00 waje i janmiet.
I wai ki dukan dai Wholesale ya ki marbaam mardih wa emkaam ha Jowai, Mihmyntdu, Ialong wa Amlarem toh ha ka Monday wa Thursday hapyrdi 9:00 waje i step hadooh 4:00 waje i janmiet. Ha Thadlaskeiñ Block wa Laskeiñ Block u wa ki ha ka sngi Wednesday hapyrdi 9:00 waje i step hadooh 4:00 waje i janmiet.
I wai ki dukan dai that, Electrical, dukan juti toh ha ka Monday wa Wednesday hapyrdi ka 9:00 waje i step hadooh 4:00 waje i janmiet.
Ki Bank wa leh yaki kaam sorkar wa ki Post Office u wai ki deiwa pynduna yaki bru wakreh. Katwa ki Bank ki wym em ki kaam wa jhan wa toh u leh ki neibynta ka sorkar toh u man ki kiwa khang.
Da chah leh wow pteiñ ya ka khayi khappood lyngba ka Tamabil Dawki heiwa u SDO (C) Amlarem daw pynmih hukum u hajrong ini. U SDO leh toh u pynchlur u yei lai chim tika kiwa yah truck kamjooh kiwi ki bru wa embynta ha ka khayi khappood.
Ki kaam wa chah u leh man ki kamni ha wah:
Ki kaam wa yatoh wa i chait i khiah, wa kynthup ya i lai e tika deiwa pynyoo ya ka COWIN Registration wa i ksoh yei bhah chim tika (Slot Booking). Ki kaam wa yatoh wa ki dawai dachin, ki Pharmacy, i lai i wan ki mar wa emkaam, i lai phah sumaar wa jhan, ki bru wa lai ya ki kaam sorkar, kamjooh kiwa lai ya ki kaam wa yatoh wa u COVID-19, ki pulit, ki chipai, ki Home Guards, ki Fire & Emergency Services, ki kaam bordiñ, ki kaam pynpoi um, ki kaam Municipal, ki kaam wa yatoh wa i saam rachon, Information and Public Relations, Telecommunication Services, ki kaam rep ha ki thaw palat sor (wa kynthup ya u kwai wa pathi), ki kaam wa yatoh wa ki mrad wa ri wa psan deilang wa ki baam yong ki, ki bru wa lai neibynta u chna ya ka Oxygen Plant ha MCH Jowai kiwa em ya ka Identity Card, ki laad pathai khubor, NARI/1917iTEAMS, ki Petrol Pump, i li booh tadong LPG, ki kaam wa yatoh wa ka MGNREGA ha ki thaw palatsor.
Ki dukan rachon hap ki u pyntikna wa deiñ ya ki Mask, u yajngai uwi ya uwi 2 meter kamjooh wow lehkhooid ya ki kti.
Ki yung krehkaam ka sorkar jylla wa ka sorkar pyrdi u wai ki katkam ka hukum wa da dep pynmih.
Lada em i yap bru, u chah wow em 10 ngut donhi ki bru deiwa pyntip cha u DC ka District lane ha u SDO ka Amlarem.
Ya ki kaam wa jhan wa yatoh wa i chait i khiah wa i lai cha kiwi ki District yow kit ya ki mar wa emkaam, ye wow yaleh da ka ‘EPASS’ ha ka website www.westjaintiahills.gov.in.
Waroh ki kaam wa da chah toh kiwa hap wow bood katkam ki kyndon khamtam wow leh ya ka Social Distancing wa kiwi ki kyndon wa da pynmih na ki por cha ki por da ka chnat i chait i khiah ka sorkar Meghalaya.
