U District Magistrate ka West Jaiñtia Hills da pynmih hukum u ynne ka sngi yow pteiñ biang ya ka “TOTAL CURFEW” hapoh ka District hadooh ka 5:00 waje i step ka 07-06-21 kawa pynbna ini wa dep kawa toh u kut hei step ka 01-06-21.
Iwi na ki daw wa pteiñ biang ya ka TOTAL CURFEW toh wa ha ka 27 wa 28 tarik uni u bnai hapoh West Jaiñtia Hills District kiwa yoh ya u khñiang COVID-19 namo ka Positivity Rate da em ki 15% iwa mut wa na kiwa chah Test da em 15% kiwa yoh ya u khñiang khlam heiwa hapoh ka ri ka Positivity Rate da em ko hapoh 10% la 6 sngi.
Kamtæ heipor wa em ka TOTAL CURFEW ym chah wow lai na kawi ka District cha kawi lait noh kitu ki kari wa lai luti cha Assam/Tripura/Manipur/Mizoram wei ym chah wow sangeh ki ha kiwon kiwon ki thaw wa em ki chnong wa em bru ha tymbud u NH-06 wa haap hapoh u pood u ang ka West Jaiñtia Hills.
Da khang leh yei lai na kawi ka District cha kawi kamjooh u lai pyn hapoh ka District. Ym chah ya kiwon kiwon wow mih cha lait lada ym toh iwa emkaam. Ki kari wa mih khlem ki Pass daw chah pynchitom ki wei kiwon kiwon kiwa leh pyrchah daw ye ki u chah kem.
Da khang leh wow pynman ya kiwon kiwon ki jait yalang paidbah, ki Conference wa ki e sikai (Training).
Ym chah yei psiah kiwa uiñke suwari kiwa na baar jylla wei waroh ki thaw uiñke suwari toh u man ki kiwa khang.
Ki kaam yalehke Sport waroh toh u man ki kiwa khang.
Ki khayi khappood wa kiwi ki ri ha Tamabil u man ki kiwa da khang.
Ki kaam chna yung kiwa em ki bru wakreh pyn hei thaw chna, kiwa ym emkaam wow wanrah bru na kiwi ki thaw toh kiwa da chah biang wow leh deiwa yoh bor chwa na u DC lane na u SDO(C) Amlarem.
Ki dukan Hardware u chah u wai ki katkam wa emkaam deiwa yoh bor na u DC lane na u SDO(C) Amlarem.
Ym chah wow pynman ya ki bia.
Ki karkhana chna kari wa ki dukan dai tiar kari u chah u wai ki du heipor wa emkaam deiwa yoh bor cha na u DC lane u SDO(C) Amlarem.
Ki kaam wa chah u leh man ki kamni ha wah:
Ki kaam wa yatoh wa i chait i khiah, wa kynthup ya i lai e tika deiwa pynyoo ya ka COWIN Registration wa i ksoh yei bhah chim tika (Slot Booking). Ki kaam wa yatoh wa ki dawai dachin, ki Pharmacy, i lai i wan ki mar wa emkaam, i lai phah sumaar wa jhan, ki bru wa lai ya ki kaam sorkar, kamjooh kiwa lai ya ki kaam wa yatoh wa u COVID-19, ki pulit, ki chipai, ki Home Guards, ki Fire & Emergency Services, ki kaam bordiñ, ki kaam pynpoi um, ki kaam Municipal, ki kaam wa yatoh wa i saam rachon, Information and Public Relations, Telecommunication Services, ki kaam rep, ki kaam wa yatoh wa ki mrad wa ri wa psan deilang wa ki baam yong ki, ki bru wa lai neibynta u chna ya ka Oxygen Plant ha MCH Jowai kiwa em ya ka Identity Card, ki laad pathai khubor, NARI/1917iTEAMS, ki Petrol Pump, i li booh tadong LPG, ki kaam wa yatoh wa ka MGNREGA.
Ki dukan rachon hap ki u pyntikna wa deiñ ya ki Mask, u yajngai uwi ya uwi 2 meter kamjooh wow lehkhooid ya ki kti.
Ki yung krehkaam ka sorkar jylla wa ka sorkar pyrdi u wai ki katkam ka hukum wa da dep pynmih.
Ki Bank wa leh yaki kaam sorkar wa ki Post Office u wai ki deiwa pynduna yaki bru wakreh. Katwa ki Bank ki wym em ki kaam wa jhan wa toh u leh ki neibynta ka sorkar toh u man ki kiwa khang.
Ki dukan wa dai marbaam, mardih, ki jhoor wa kiwi kiwa emkaam man-ka-sngi kiwa em ha ki dong, daw pynbait yei rukom wai ki da ki waheh chnong wei da pynchlur wow leh da ka Home Delivery da kiwa dai ha ki jar jiar ki dong deiwa pait u Incident Commander.
Lada em i yap bru, u chah wow em 10 ngut donhi ki bru deiwa pyntip cha u DC ka District lane ha u SDO ka Amlarem.
Ya ki kaam wa jhan wa yatoh wa i chait i khiah wa i lai cha kiwi ki District yow kit ya ki mar wa emkaam, ye wow yaleh da ka ‘EPASS’ ha ka website www.westjaintiahills.gov.in.
Waroh ki kaam wa da chah toh kiwa hap wow bood katkam ki kyndon khamtam wow leh ya ka Social Distancing wa kiwi ki kyndon wa da pynmih na ki por cha ki por da ka chnat i chait i khiah ka sorkar Meghalaya.
