Shillong: Ka Meghalaya College Teachers’ Association (MCTA) St. Edmund’s College Unit da rai ki wow pynjoor yaka yakhih hadooh wow yoh ya waroh ki dawa yong ki wa kynthup yei thung kreh biang ya u Assistant Prof. Jeffreyson Wahlang.
Hawa yaklam wa kiwa thoh khubor ynnin ka sngi, ka President ka MTCA, Central Body ka Dr. B.H. Buam da ong ko wa kiwa sikai ym pyndam ki ya ka yakhih lada ym man kaam ka dawa yong ki wei u pteiñ hi ki ya ka yakhih.
Ka MCTA General Secretary ka Amanda Basaiawmoit da khana ko leh wa da dep e FIR pyrchah ya kiwa pyllai ya ka St. Edmund’s College wei ka MTCA da pynkhreh ko ya ki yakhih kiwa daw pynbna ha kini ki sngi wow wan.
Ka Basaiawmoit da ong ko wa ya u Assistant Prof. Jeffreyson Wahlang da thung kreh ya oo katkam wa lait kaam hapoh ka College wei da kreh u da jan dap 10 snem. Da jied ya oo kam uwa biang hadien wa dep pynman yaka Interview neibynta ka kaam wa lait ha ka Ddepartment of Sociology wei katni da pyndooh yei kaam u chwa wow yoh u man kam uwa kreh wa pura neibhah hadooh katni da thung ya oo kam uwa kreh chipor donhi neibynta ka kaam wa lait kawa man kawa pura.
Da pyntip ko leh wa haka 12 tarik u bnai wa da dep, chwa kattu katni sngi wow thung ya oo kam uwa kreh wa pura da phah chithi cha oo wa da chah pyndam u na i kreh yong oo kawa ym em yurim deiwa e daw wa u Wahlang wa em bynta u waka MCTA hawa pynman yaka rah lama rong yong namo ka Black Flag wa pynman haka 20 tarik u Naisan yong uni u snem, “I ym ye u pdiang ya ini i leh embor kiwa pynlai ya kani ka thaw puræ hadooh wow pyndooh kreh ya u Wahlang hajrong ini donhi i yurim wa khian wa nai.”
Da ong leh wa kiwa pynlai ya kiwon kiwon ki College toh kiwa da yoh bor wa tipmit da ka sorkar deiwa ong, “Ha ka yalang wa pynman wow rai u pyndooh kaam noh ya u Wahlang, ym em ki wakreh ka College, ki manbei manpa, kiwa sikai hadooh kiwa mihkhmat ka sorkar wei da em du kiwa pyndap pynbiang ya kani ka thaw puræ hanlada u Wahlang da ksoh u ya kani ka kaam wa da tipmit daka sorkar namo ka Government Sanctioned Post.
Da pyntip ko leh wa ka wa u montri ka chnat puræ puthi u Lahkmen Rymbui ym em khular u iyi iyi leh, kamtæ da ong ko, “I kwah i wa waroh u tip ki wa neidaw wa ym ye ka sorkar leh wow chim ya kawon kawon ka rai, kamtæ u pteiñ i ya ka yakhih yong i.”
Neiliang u Prof. David F. Marbaninag da ong u wa kiwa sikai da pynbor ya ki wow mih ki cha sarok neidaw wa kiwa pynlai ya kani ka thaw puræ ym bien ki u wow pynbait ya kani ka kaam deiwa suk pyn hapoh kani ka thaw puræ.
Kam wow pynkynmoo leh wa kani ka seiñ da ujor ko pyrchah ya u Bro. Simon Coelho uwa man kam u Secretary ka Governing Body (GB) ka St. Edmund’s College deiwa pynbaad wa pynemkaam bakla ya ka poisa sorkar deiwa ya krehlang wa u Principal u Dr. Sylvanus Lamare.
Discussion about this post