U District Magistrate ka East Jaiñtia Hills District da pynmih hukum u wow pynkylla ya ka hukum wa da pynmih ha ka 28-05-21 neidaw wa pteiñ i ku kiwa yoh COVID-19 hapoh ka District heiwa ka khlam da poor ko leh cha ki chnong palatsor ka District, kamtæ yow ye u kdoh u khoom ya ini i poor ka khlam, da pynkrehkaam biang ya ki CONTAINMENT MEASURES hapoh waroh kawi ka District.
Kini ki Containment Measures u krehkaam ki nadooh 4:00 waje i janmiet ka 07-06-21 hadooh 05:00 waje i step ka 14-06-21.
Kamtæ da khang wow pynman ya kiwon kiwon ki yalang paidbah wa kynthup yei pynman ya ki Conference wa ki Training.
Ka hukum da khang ko leh yei lai i wan hapyrdi ki District tangwa ym em khang yei lai ki kari wa lai luti cha Assam/Tripura/Manipur/Mizoram.
Ki kaam E-Commerce wa kiwa leh ya ki Courier Service toh kiwa chah wow leh deiwa yoh bor chwa na ka yung krehkaam u DC.
Ki kreh chna yung ha ki thaw sorkar wa ki bru samen kiwa ym emkaam yei wanrah wakreh na kiwi ki thaw toh kiwa da chah wow pteiñ deiwa yoh bor na u District Magistrate, East Jaiñtia Hills District.
Ki dukan wa em ha ki dong ki chnong u chah u wai ki nadooh 2:00 waje i sngi hadooh 6:00 waje i janmiet deiwa bood ya ki kyndon yada khlam wei katkam i pynbait ki dorbar chnong/VDP.
Ha ki yung wa em wa yap bru, u chah wow yalang du hapoh 20 ngut donhi deiwa yoh bor chwa na u DC.
Ym chah wow pynman ya ki bia wa ki yalehke Sports.
Waroh ki yaw wa heh ha ki thaaiñ Khliehriat East wa West, waroh ka Ladrymbai, Umpleng, Chiehruphi, Lumshnong, Sohkymphor, Sookilo, Saipung, Samasi, Jalaphet, Rymbai, Wapung, Sutnga, Bataw, Mynkre wa Ukmiang u man ki kiwa khang ha kini ki por lait na ki dukan dai dawai. Waroh ki yaw wa heh u chah wow wai ki du ha ka 07-06-21 (Monday), 09-06-21 (Wednesday) wa ha ka 11-06-21 katkam ka hukum wa da pynmih ha ka 05-06-21.
Ki dukan dai baam wa em harood sarok kam ki Dhaba, ki dukan cha u chah u wai ki du wow song baam donhi ym toh deiwa chong baam.
Ki kaam wa chah:
Ym em khang ya ki kaam wa yatoh wa i chait i khiah, i lai e tika, kiwa dai dawai, i lai i wan ki mar, ki bru wa lai ya ki kaam sorkar, ki pulit, Security & Armed Forces, Civil Defence & Home Guards, NDRF, SDRF, Fire & Emergency Services, MePDCL, POWERGRID, PHE, Public Distribution System (PDS), DIPR, Telecommunication Services, ki pathai khubor, Petrol Pump, Nowel Gas wa Bharat Gas Distributor, ki warep ha ki thaw palat sor (wa kynthup ya i rep pathi rep kwai), ki kaam ka MGNREGA, kiwa ri mrad, kiwa psan dakha wa i kit ya ki symbe dakha.
Ki yung krehkaam ka sorkar jylla u wai ki katkam ka hukum wa pynmih da ka Personnel & AR (A) Department deiwa pynduna ya ki bru wakreh,
Waroh ki Bank ha ka District u chah wow wai ki nadooh ka 07-06-21 hadooh ka 19-06-21 deiwa pynduna bru wakreh wei toh u khang ki hapoh 4:00 waje i janmiet.
Waroh ki Post Office u wai ki nadooh ka 07-06-21 hadooh ka 19-06-21 deiwa pynduna ya ki bru wakreh.
Waroh ki skur ki College u pteiñ ki ya ki Online Class.
