Jowai : Kiwa kreh ka tnat Health hapoh East waka West Jaiñtia Hills District kiwa em 712 ngut (Temporary wa Permanent) khlem kheiñ yaki Doctor da dooh tulop ki nadooh u bnai Wisu (March) yong uni u snem.
Ini i dooh tulop toh nediaw wa kiwa kreh kani ka tnat ym em yoh ki yaka kot wa tip kamka “Retention of Post” naka sorkar nadooh u snem 2011 wei khlem em kani ka kot kiwa kreh ha waroh ki kaam ym ye ka sorkar jylla u pyllait yaka tulop yong ki.
Ya kani ka kot emkaam yow kyntu ha ka Employee Database kawa tip kam ka Personnel Leave and Salary Management Application (PLASMA) kawa pynpoi yaka tulop cha ki Bank Account kiwa kreh neibhah kani ka kot pynsakhiat ko wa kiwa kreh sorkar man kiwa dang ksoh hi ka srokar kam kiwa kreh yong ka.
Kani ka kot “Retention of Post” toh kawa haap pynthmme man u snem ya waroh kiwa kreh (Permanent wa Temporary) ka sorkar jylla. Hei yatoh weini ynne ka sngi u DM&HO ka Jaiñtia Hills u Dr. I. Tongper ong u wa neiliang ka ophis yong oo da dep paan ko ya kani ka kot “Retention of Post” nadooh u snem 2011 katwa neiliang ka tnat Health slem ko u pynpoi ya kani ka kot cha ka ophis wei da e leh ya kani ka kot ha u Naichiphaw (October) 2015 tangwa neh bait ki cha Shillong.
Kamtæ ong u wa neiliang yong oo dadep thoh u cha kiwa toh u pait yeini wei ynne ka sngi da pynbiang lut ki ya kini kot wei ha kani ka tayaw u pyllait noh yaka tulop kiwa kreh waroh.
Ya ka tulop u pyllait ya ka le sien heiwa ha kani ka tayaw u pyllait yong ka chibnai, hadien chi tayaw u pyllait sa chibnai wei hadien chi tayaw biang u pyllait ya kawa dang sah.
Discussion about this post