U Montri wa pait ya ka chnat Puræ Puthi ha ka jylla, u Rakkam A Sangma da maham u wow pynchitom deiwa khor ya kiwon kiwon kiwa sikai skur kiwa e wow leh da kiwi yei kaam yong ki (Proxy Teacher), ha kylleiñ ki skur yong ka sorkar hapoh ka jylla.
Hawa klam wa kiwa thoh khubor, u Rakkam da ong u wa sñiaw u wa em kiwa sikai kiwa e wow lai kreh da kiwi heithaw yong ki wei ini toh i wym ye u pdiang wei kawa pyrchah ya ki kyndon.
“Lada chem i ya kiwon kiwon ki ujor wa kam ini, ka sorkar daw leh ko deiwa eh pyrchah ya kitæ kiwa sikai. I da kyntu i leh ya kiwa sikai wa lada yaleh kreh phi wow sikai wow sñiawbha phi wow man bait kam kiwa sikai”, da ong u Rakkam.
Da ong u wa ka sorkar daw pynmih ko leh yei pynbna yow maham deiwa khor ya kiwa pynlai ya ki thaw puræ.
“Ini toh i kitkhlieh yong kiwa pynlai skur wa lada e laad ki wow thung kreh da kiwi neibhah toh u sñiawthooh ki wa kiwa sikai toh u kreh bait kam kiwa sikai hawa da jied ya itæ i kaam, tangwa lada em phi ki kaam wa jhan ye phi wow chim da ka ka chuti kamwa toh i rukom”, da ong u.
U Rakkam da ong u wa em boon ki skur kiwa da thung ya kiwa sikai deiwa pynlut hi na ki hi yow pyndap yei duna kiwa sikai. “Tangwa ym ye phi wow thung won da kiwi heithaw yong phi, ini toh iwa bakla,” da ong chooh chooh u.
Hawa kyntu ya kiwa sikai wym toh u leh ki kam ya ini i jait kaam, u Montri da ong u wa kiwa sikai toh u em ki yei kitkhlieh, wei kani toh ka kaamram yong kiwa pynlai skur yow pyntikna wa kiwa sikai waroh toh u man ki kiwa lai tista cha ki skur.
“Lada ym lai tista cha skur, daw pynsih ya ka mynried yong ka ri, daw pynsih phi ya ka mynried ki khynnah. Hawa phi man phi kam kiwa sikai waroh da yooluti wei chaniah ki, lada man na ka sorkar na ka imlang sahlang, na ki bei ki pa yong ki khynnah puræ, ham pyndooh yeini wa chaniah”, da ong u Rakkam.
Discussion about this post