Jowai : Kam chibynta yow yarap wei wow pynthymme yei rukom chakri ya ki paidbah khamtamhei poi ka bill light ka MePDCL u sdang pyndait ko da u prepaid meter wa tip leh kam u smart meter.
Heiyaklam wa u Executive Engineer ka Jowai Revenue Division u ma J. Sumer da ong uwa u sdang pyndait ya u prepaid meter chwa ha quarter ka MeECL, wa kiwi ki office sorkar.
Uni u meter u saam mynkna ya oo wei chong ha ki bru lada kwah ki mo ym kwah ki ya uni u meter wei u kheiñ du ya ka bai wai (rental).
I daw wa wanrah ya uni u meter toh yow pynche yei rukom pynemkaam light wei yei rukom poi ka bill light yong ki paidbah wei ye ki u recharge katkam wa poi ka bill ki man la u bnai heiwa ye ki leh u booh ya chibynta uni u meter heiwon heiwon i thaw ha yung yong ki.
I rukom krehkaam uni u meter toh yasariem bha wa ka phone prepaid. Ha uni u meter ye phi u thied katwa emkaam phi ya ka light ha yung næ ha ki thaw kreh iwa mut lada emkaam light phi T. 500 ye phi u thied du ya katni donhi wei manda lut kani ka T. 500 uni u meter daw ah noh u ka ka light. Tangwa ym ah u ya ka light kam ha ki sngi wa emkaam kam ka Christmas hanlada lut ka poisa wa thap ha uni u meter.
Ya ki recharge ye phi u thied na ka ophis ka MePDCL heiwa daw e ki ya phi ki number wa 20 tylli kiwa u thap phi ha uni u meter. Yei bynta u thap recharge ye phi ki u booh ha ki kamra wa em ha yung wei heini ye phi u yoo ya ka poisa wa dang sah kamjooh leh chwa u lut ka poisa daw pynkeh u yei sur yow tip wa hap recharge biang oo.
Ya ka poisa wa em ha uni u meter ym ah ya ka lada ym em pynemkaam ya ka light iwa mut ka poisa u neh ko katwa ym em pynlut ka iwa mut ym em expiry date ko.
Deiwa em uni u meter da yooluti wa iwa jooh mih i ood ki paidbah wa joor wa ku ka bai light hanlada duna i pynemkaam, daw wiar lut i.
Discussion about this post