Ka sorkar jylla ynne haka yachem ki Montri da mynjur ko yaka Meghalaya State Investment Promotion & Facilitation Bill 2024 wei hapoh kani daw em ka Investment Meghalaya Authority kawa daw mih heithaw ka Single Window Agency.
Hawa pyntip yeini, u Montri Rangbah ka jylla, u Conrad Sangma da ong u wa ka Single Window Agency toh kawa da rim bha wei da emkaam wow pynbait ya iwa boon wa duna haka, wei deiwa wanrah da kani ka Bill wa thymme daw em leh ka Website wa ye ki bru wow booh Application yow sdang ya kiwon kiwon ki khih kam ki karkhana wa ki kaam wa yatoh wa i chait i khiah, ka puræ puthi, ki kaam uiñke suwari, IT wa kiwi kiwi de.
Lyngba kani ka Website kiwa kwah u wan seiñ khih ye ki wow booddien heiwon poi ka Application ki.
Ya ki jait khih wa hap u pynlut hapoh Rs. 1 klur, daw pait da ka Committee wa khlieh da ki DC, kiwa Rs. 1 klur hadooh Rs. 10 klur daw emkaam u yoh mynjur da ka Committee wa khlieh da u Chief Secretary katwa ki khih wa daw pynlut plat ya Rs. 10 klur daw phah cha ka Investment Meghalaya Authority kawa daw khlieh da u Montri Rangbah.
U Conrad da ong u wa deiwa wanrah ya kani daw pynsuk yei sdang khih hapoh ka jylla deiwa ye u leh ya waroh ha kawi ka thaw deiwa thung da ki Committee yow pait ya kiwa boon ki jait khih neibhah nachwa lyngba ka Single Window Agency lada toh ki kaam bordiñ hadooh ki kaam sdang da ka tyndur chet baam da emkaam u yoh bor na u Montri Rangbah.
Da pyntip u leh wa ya kani ka Bill daw wanrah ka ha kani ka dorbar mang tangka yow yoh ko yei mynjur yow man noh kam ka aiñ.
Discussion about this post