Jowai: Ka Maruti Suzuki Omni kawa tip kiwa boon kam ka Maruti Van da pynbna wa hadien 35 snem i pynmih ya ka, u pyndam noh ka hadien wa pynkrehkaam ya ka Bharat New Vehicles Safety Assessment Program (BNVSAP) ha u Naichiphaw u 2020.
Ka Maruti Van man ko kawa ka-it bha ki bru wow kamai kari hadooh chapoh ka ri-loom Jaiñtia khamtam kiwa lai cha Ummulong wei da pynmih paidbah ya ka 35 snem nachwa ha u snem 1984 wei dang man hi ko kawi lai dai bha tangwa nadooh wa mih ki kyndon ya ki kari kiwa emkaam wow man kiwa ye u yada ya kiwa chong kari da chim noh ya ka rai wow pyndam noh u chna ya kani ka kari.
Heithaw ka Maruti Van, ka Maruti Suzuki India (MSI) daw pynmih noh ko da ki Model thymme ka Maruti Eeco kiwa em leh ya ki kyndon wa hap wow bood ya ki kari wa katni kam ki Seatbelt ya kiwa chong hapoh kari ym du ya kiwa yah kari waka Reverse Parking Assist ka wow yarap ya kiwa yah kari heipor wa ran ki dei dien.
Ka sorkar leh da phah ko wa waroh toh u em ki ya ki ABS, Airbags wei wow bood ya ki BSVI heiyatoh wa i mih tdem iwa da pynboor ya ki Company wa boon wow dam noh ki wow pynmih ya ki kari yong ki hanlada man ki kiwa lai dai bha.
Kiwi de ki kari ka Maruti Suzuki kiwa ye u chah bichaar ha kini ki kyndon wa thymme yow man ki kari kiwa ye u yada ya kiwa chong toh ka Eeco Van waka Alto 800. Heiwa ka Maruti Suzuki da ong ki wa ye hi u pynchna ya kini ki kari yow man ki katkam ka kyrdan wa da yooluti ka sorkar.
Discussion about this post