Ka Khasi Students’ Union (KSU) da lehkmen ko ya ka lyngkhooh sngi yap wa 34 snem yong u Syiem Khynnah ka Hima Nongstoin, u Pa’iem Wickliffe Syiem. Ha kani ka sngi ka KSU da pynman ko leh yei ya phyllu sani hajrong ka Standstill Agreement, Instrument of Accession & Annexed Agreement wa hajrong ka Sixth Schedule ha ka yalang wa da pynman ha Multi-Use Convention Hall, NEHU.
Ki bru wa paawkhmat kiwa da pachat yei sboh pyrkhat hajrong katai ka phang toh u CEM warim ka KHADC, u Pynshgnain N. Syiem, u President warim ka KSU wa uwa man katni kam u Executive Member ka KHADC, u Paul Lyngdoh, u President ka HNYF, u Sadon Blah, u Adviser wa Spokesperson yong ka Federation of Khasi States, u John F Kharshiing wa uwa thoh kot wa bnanaam, u Spiton Kharakor. Ya kani ka ya phyllu da pynlai da u Auditor warim ka KSU (CEC 1978), u Vijay Lyngdoh.
Ka KSU ha kani ka sngi da chim ko leh ya ka rai wow pynkhai im biang ya ka soskular Instrument of Accession (IOA) wa da ya soi da ki Syiem Khasi yong ki 25 tylli ki Hima wa ka sorkar India, chooh chooh ka KSU da rai ko leh wow kyntu ya ka sorkar pyrdi wow burom ya ini i kdoh kular.
U President ka KSU, u Lambokstarwell Marngar hawa pynbna yei rai da ong u wa kani ka soskular da sahteiñ kattu la 75 snem, wei ka seiñ daw phah ko yei thoh cha ka sorkar India wei wow paan pynche lada daw pynkrehkaam namo ym pynkrehkaam ya ki le tylli ki phang wa kongsan yong ka soskular.
U President ka KSU da ong u leh wa ka seiñ daw kyntu ko leh ya ka sorkar pyrdi wow pynkup bor wei wow e leh yei yada wa kyrpang ya ki bru ri-loom ka jylla deiwa pynkrehkaam ya ka Article 371 (A) & (G) kamwa da leh ha ka jylla Mizoram wa Nagaland.
Ha kani ka sngi da wan wow emlang leh ki khon u Pa’iem Wickliffe, kiwa dang lai puræ College waphær waphær, ki bru wa bnanaam, ki waheh chnong, ki Syiem, ki Dolloi wa ki Sordar.
Ha kani ka sngi ka seiñ da pynlait leh yei riñdur yei rwai neibynta ka Documentary yong ka seiñ, wei yeini i rwai da pynlait da ka khon yong u Rana Kharkongor, ka Maphiadalin Kharhunai.
