Ka Dorbar Chnong Umkiang da beiñ joor ko ya ki baar jylla kiwa man leh kam kiwa kreh ka MCL (Topcem) kiwa da man i daw wa chah dat chah bom naphang ki paidbah nadooh ki khynnah khian wa ki khynnah kynthai ha ka sngi wa pynman ya ka Public Hearing da ka Meghalaya State Pollution Control Board neibynta wow pyneh yei pynmih Clinker, i khyndaw-bilat wa kiwi de yong kani ka karkhana wa em ha Thangskai, East Jaiñtia Hills Disrtrict, ha ka tarik 24 tarik uni u bnai.
Ka dorbar chnong da ong ko wa katkam wa da yoo ha ki laad pathai khubor, da em i sympat, i kura wei kynjat naphang ya ki paitbah khlem da maap la kam ki mrad wei ini i leh yong kitai ki baar jylla wow hukum ya ki pulit wow bom naphang ya ki paidbah ryngkat wa ki ktien sih ktien sang wot hapyrdi wa em ki khynthai wa ki manbei toh i wym ye u pdiang hapoh ka imlang sahlang yong ka Bri U Ynñiaw Trep.
Kamtæ ka Dorbar Chnong Umkiang da dawa joor ko ya ki bor wa toh u pait ya kani ka karkhana wow beh kaam syndon ya kitai ki baar jylla kiwa man leh kiwa kreh yong ka wei da kyntu leh ya ki pulit wow kem wei pynchitom ya kitai ki baar jylla katkam ka aiñ khnang wa kiwi won kiwa na baar jylla wym em de ki wow chim yei bor hukum ha idæ wow phah dat næ wow phah pynyap ya ki paidbah.
Da ong leh wa hei yong sakhiat, kiwa kreh baar jylla toh du kiwa mylla næ kiwa khayi wei ym em hok ki wow leh tre, leh heh, klam heh wei klam sih klam sang hapoh ka ri Khasi Jaiñtia yong i. Wei kam kiwa chong chnong ka thaaiñ Elaka Narpuh ym ye wow pdiang ya itai i leh embor yong kitai ki baar jylla.
Ka Dorbar Chnong Umkiang daw pynkhih paidbah ko wow leh deiwa eh ya ki baar jylla lada dang jia kamtai ya ki tre ri tre muluk neini chakhmat katkam ka aiñ. Da kitbok kitrwiang leh ya kitu ki para doh para snaam kiwa chah pynmynsoo ha katai ka sngi yow yoh ki yei doh i pran wa chait wa khiah lyngba i emlang u Blai Tre Kynrad najrong.
Discussion about this post