Hadien wa pteiñ i poor ka COVID-19 ha ka jylla wa ha ka District iwa da wanrah yei khynñia ki Hospital ha Shillong wa ha Jowai, kamtæ u District Magistrate, East Jaiñtia Hills District da pynkrehkaam u da ka Section 144 Cr.PC chirup wa ka Regulation 3 ka Meghalaya Epidemic Diseases, COVID-19 Regulations, 2020 wow khoom u kdoh deiwa pynkrehkaam da ki “Containment Measures” ha East Jaiñtia Hills District ki wow krehkaam nadooh 4:00 waje i janmiet ka 31-05-21 hadooh 5:00 waje i step ka 07-06-21.
Ka hukum da khang ko yei lai i wan hapyrdi ki District khlem em i daw, wei ki kari kiwa lai khlem em Pass daw chah pynchitom ki katkam ki kyndon ka aiñ.
U District Magistrate da khang u leh ya ki yaw kam ha Khliehriat East wa Khliehriat West, waroh kawi ka Ladrymbai, Umpleng, Chiehruphi, Lumshnong, Sohkymphor, Sookilo, Saipung, Samasi, Jalaphet, Rymbai, Wapung, Sutnga, Bataw wa Umkiang wei u chah wow wai ki toh du ha ka 04-06-21 katkam ki kyndon ka Dorbar Chnong ki VDP wa ki Market Committee. Ki dukan samen ha ki chnong ye ki wow wai nadooh 2:00 waje i sngi hadooh 6:00 waje i janmiet deiwa bood ya ki kyndon wa pynbait ka Dorbar Chnong.
Ki kreh chna yung ha ki thaw sorkar wa ki bru samen kiwa ym emkaam yei lai i wan ki mistri, da chah wow kreh ki deiwa yohbor na u District Magistrate, East Jaiñtia Hills District.
Waroh ki yalang paidbah la ha iwon iwon i dur da khang pyrchah ya ki iwa kynthup leh ya ki bia, ki lehke Sports wa kiwi kiwi katwa ki yung krehkaam sokrar jylla/pyrdi u wai ki deiwa pynduna ya kiwa kreh katkam ki kyndon ka sorkar.
Choo chooh ka State Bank of India wa ka Punjab National Bank, Khliehriat Branch u wai hi ki tangwa deiwa pynduna ya kiwa kreh katwa kiwi ki Bank hapoh ka District u wai ki du ha ka 31 tarik uni u bnai wa ha ka 4 tarik u Naiynru deiwa pynduna ya kiwa kreh.
Waroh ki Post Office u wai ki ha ka 1 Naiynru hadooh ka 5 Naiynru deiwa pynduna ya kiwa kreh wei toh u khang ki hapoh 3:00 waje i sngi.
Da chah leh ya ki Home Delivery Service kiwa da yohbor.
Ha ki yung wa em wa yap u em bru du hapoh 20 ngut donhi.
Kani ka hukum ym kreh ko ya kiwa kreh ha i chait i khiah, kiwa emkaam dawai jhan wa ki lai e dawai tika heiwa kiwa chim tika emkaam wow pynyoo ki ya ka COWIN Registration.
Da chah leh wow kit ya ki dawai wei da chah leh ya kiwa lai e sumaar COVID-19, pulit, Security & Armed Forces, Civil Defence & Home Guards, Fire & Emergency Services, Electricity, PHE, Public Distribution System (PDS), PWD, Information & Public Relations wa Telecommunication Services.
Chooh chooh da chah ya kiwa pathai khubor, Petrol Pump, LPG, ki warep ha ki thaw palat sor (wa kynthup ya i rep pathi rep kwai), ka MGNREGA wa kiwa psan mrad.
