Shillong: Ka sorkar jylla ynne ka sngi da mynjur ko wow pynkrehkaam noh ya ka Meghalaya Health System Strengthening (MHSS), wei lyngba ka MHSS daw pynkhlan yei krehkaam ha ka chnat i chait i khiah wa ki thaw sumaar kiwa em ha ka jylla.
U Montri ka sorkar jylla, u James K Sangma hawa klam cha ki laad pathai khubor, da pyntip u wa i lut deiwa pynkrehkaam ya ka MHSS u man ko kamwa T.352 klur ha ki san snem, wei i rukom bhah yei lutsan u man ko 80% naka World Bank katwa 20% u man ko na ka sorkar jylla.
Da pyntip u leh wa ka chnat Health & Family Welfare daw thung ko ya kawi ka Executive Committee wow haap hapoh i pait yong ka Project Steering Committee (PSC) neibynta wow pynkrehkaam ya ka MHSS.
Ka kynhun montri yong ka sorkar MDA ynne ka sngi da mynjur ko leh ya ki kyndon thymme wow pynkrehkaam ya ka Meghalaya Environment Protection Restoration Fund (MEPRF) kamwa da phah da ka National Green Tribunal (NGT). U James K Sangma da pyntip u leh wa hadooh kattæ, ka MEPRF wa da yoh lum, da em ko palat T.445 klur.
