U Symbood Montri Rangbah ka jylla, u Prestone Tynsong ynnin da booh u ya u mooyurim yow pynku kyrdan noh ya ka Pynursla CHC cha ka Sub-Divisional Hospital deiwa emlang ka Dr. M. Ampareen Lyngdoh, ka Montri ka chnat i chait i khiah wa kiwi de ki sahep ka Pynursla Community Health Centre (CHC), East Khasi Hills District.
Ha kani ka jooh ka sngi da wai leh ya ka First Referral Unit (FRU) wa em ha Pynursla CHC hi.
U Prestone hawa e yei klam da ong u wa ka sorkar booh ko hakhmat dooh yow pynbha pynmiat ya ki thaw sumaar wa em ha kylleiñ ka Meghalaya wei ini i pynku kyrdan ya ka Pynursla CHC cha ka Sub-Divisional Hospital man ko kawi na ki laad wow pynsuk ya kiwa chong chnong kani ka thaaiñ heiyatoh wa i e sumaar sukhær.
Da khana u leh wa ka sorkar da booh ko ka mang poisa wa ar hei boon dooh du neibynta i chait i khiah wei da pynchlur u leh ya kiwa chong chnong ka Pynursla wow thap pyrtuid ki hapoh ka Meghalaya Health Insurance Scheme (MHIS) kamjooh wow pynyabi ya u Aadhaar Card yow myntoi bha na ki laad yarap wa e ka sorkar.
Ka Ampareen da kdaw ko yeiwa emkaam wow pynku kyrdan cha ka Sub-Divisional Hospital yow e yei chakri cha ki paidbah ya waroh wei i wai ya kani ka First Referral Unit (FRU) daw e yarap kyrpang ko waroh 24 kynta nadooh wow e dawai, u pynkha khon, i chait i khiah ki kynthai wa punkhon, i pooid wa i chait i khiah ki khonboo wei ym emkaam de wow lai ki cha jngai yow yoh sumaar.
Da khana ko leh wa daw pynkrehkaam noh ya ka thaw booh snaam ha kani ka Hospital.
Discussion about this post