Ynnin i miet ka 20 tarik, u kyrtong ka NPP na Jowai, u Wailadmiki Shylla da pynman u ya ka yalang yalap Election ha Ladthalaboh, Jowai heiwa da pynsñiaw u ya ki ki kreh namo ki Project thymme ki wow pynkreh neibynta ka sor Jowai.
Neiliang u Wailadmiki da pynsñiaw u ya ka Scheme wa thymme heiyatoh wa i rukom saam um ha Jowai heiwa katni da sakhi ya ki kreh wa lai chaaid chaaid wow chna ya ki Top um ha ki jar jiar ki chnong.
Da pynsñiaw u leh yei emkaam wow pynku kyrdan ya ka Ialong Civil District Hospital cha ka State Hospital kamwa man ha nongbah Shillong wa Tura heiwa ki paidbah ym emkaam de ki wow lai cha baar ka District wa ki thaw sumaar ki bru samen.
Chooh chooh da pynsñiaw u wa emkaam wow pynku ya ki kaam yalehke Sports hapoh ka District deiwa pynmiat pynbha ya ka madan Kiang Nangbah Stadium nadooh ki Track, ki Flood Light wow pynche heipor wa yalehke dei miet, ki Gallery wa kiwi kiwi.
Heijooh i por kam uwa mihkhmat da kular u wow pteiñ ya ki e sikai (wow pynlut na kata u) neibynta ki khynnah wa ki khynroo khyllood heiwa kammon u ye ki wow yieñ ha ki kjat yong ki hi deiwa seiñ ki ya ki kreh deiwa chim leh ya ki laad yarap wa e ka sorkar wei u pteiñ u leh ka e sikai ya ki khynnah kiwa pynkhreh ya ki Exam SSLC ha ki san snem wow wan.
Ha kani ka yalang u Wailadmiki da khana u leh ya ki kaam wa da leh u neibynta ka chnong Ladthadlaboh lyngba ki Scheme waphær waphær khamtam heipor ka khlam COVID-19, deiwa e ya ka Ambulance wei wow chna ya ka Indoor Hall ka chnong.
Da kyntu leh ya ki paidbah ka Ladthalaboh wow kyrchaan biang ya oo ha kani ka kynti khnang wow ye u wow wanrah ya ki kaam pynroi sam chaphrang hapoh ka chnong.
