Ka Company wa dai sula lyngba ka Internet ka Myntra da rai ko wow pynkylla noh ya u chap (Logo) yong ka hadien wa em ka kynthai kawa na Mumbai da ujor ko waki Cyber Police deiwa ong uwa uni u Logo toh uwa yoo khlem akor i dur u khamtam yaki kynthai.
Kani ka bru kawa tip kam ka Naaz Patel toh kawa krehlang waka Avesta Foundation NGO wei da ujor ko ha u Kmaichonglad (Dec), 2020 yow phah pyndam noh ya uni u Logo ka Myntra kawa man leh ka Company kawa em hapoh ka Flipkart, wei ya ini da lai rah ko leh ha kiwa boon ki rynsan wa ha ki Social Media.
Neiliang ka DCP Rashmi Karandikar ka Mumbai Police Cyber Crime da ong ko waka chnat leh chem ko wa uni u Logo ka Myntra toh uwa yoo khlem akor hawa yatoh wa ki kynthai heiwa hadien wa wan ka ujor, da phah ki da i email cha ki heh ka Myntra kiwa da mynjur wow kylla noh ya u Logo ki hapoh chi bnai.
