Ka sorkar Meghalaya da pynbna ko ya ka ₹240 klur neibynta ki le snem wow wan kam chibynta ka Floriculture Mission 1.0 yow pynkylla ya ka jylla kam ka thaw wa khlan u pynmih ya ki syntu hapoh ka thaaiñ Northeast wa hapoh ka ri.
Yeini da pynbna da u Montri Rangbah ka jylla, u Conrad Sangma hawa lai u cha ka chnong Mawkriah, East Khasi Hills deiwa emlang ka Montri ka chnat Agriculture, ka Dr. Ampareen Lyngdoh wa u Ronnie Lyngdoh, MLA.
Kani ka Floriculture Mission toh kawa da sdang ha u March 2024 deiwa booh thong yow yoh myntoi ki 3000 ngut ki warep deiwa e ₹7 lak kam ka Subsidy yow yarap u sdang, yow ye u pyndap yei lutsan, i bai tiar bai tar wa i e sikai (Training). Kamwa man kattæ da em awjan dap 500 ngut ki warep kiwa da yoh myntoi.
U Conrad hawa e yei klam da ong u wa da yooluti wow yoh nong hadooh ₹600 klur lyngba kani ka Mission.
Kani ka Scheme toh u pyrchang ko wow pynchlur thung ya ki syntu wa ye u dai dei dor wa syad kam ki Orchid (Dendrobium, Cymbidium, Vanda, Phalaenopsis) wa ki Oriental Lilium, kiwa man kam ki jait syntu wa lai yaaw bha ha India kamjooh cha kiwi ki ri. Da ong u leh wa i rukom man ka suiñbneiñ cha i yarap bha ko wow thung ya kam kini ki jait syntu.
Yow yarap u thung ya kini ki jait syntu, ka sorkar u krehlang ko wa ka Darjeeling Gardens deilang ka North Bengal Floritech heiwa kini daw yarap ki leh wow thied ya kini ki syntu kamjooh wow pynyoh thaw dai ki ha ki le snem.
Da pyntip u leh wa da em ki syntu kiwa da jied kiwa mihbha ha jar jiar ki thaw ka jylla wei da pynkhreh wow booh ya ki yarap kammon wow thung wow sumaar ki.
Da e nongmuna u yei krehkaam ka Lakadong Turmeric Mission heiwa da ye wow pynmih chirmit na ka 1,000 MT cha palat 20,000 MT deiwa pynlut ka sorkar kamjooh deiwa em ki SHG kiwa em jar jiar ki thaw pynmih chirmit.
Discussion about this post