U Montri Rangbah ka jylla, u Conrad Kongal Sangma da ong u wa hanla ka sorkar daw yachem ko yei eh wow pynyoh hadooh T. 90 klur wow thied ya ki dawai tika yada COVID-19 yow e kamwa 30 lak sien neibynta ki 15 lak ngut kiwa chong chnong wa 18 snem hadooh 44 snem i rta ha i dor T. 300 chi Inject, u lai chakhmat neibhah wa emkaam neibynta kiwa chong chnong ka jylla, wei da ong u leh wa ka sorkar jylla daw yaklam ko leh wa ka sorkar pyrdi yow pynhiar ya i dor.
Da ong u wa i pynkhreh wow e tika neibynta kiwa chong chnong kiwa nadooh 18 snem chaneiñ da lai ko, wei da pyntip leh wa da em ki thaw wa da ye wow e tika aw jan waroh kiwa da palat 45 snem i rta, wei da pynsñiaw leh yei kyrmen wa daw ye wow pyndep lut ya i e tika ya ki ha kini ki tayaw wow wan.
Hawa yatoh wa i sdang wow e ya i tika neibynta kiwa 18 snem chaneiñ, u Conrad da ong u wa i pynpsiah pyrtuid da lai i, tangwa da ong u wa kamwa man katni neidaw wa duna ki dawai hapoh ka ri waroh kawi, kiwa boon ki jylla ym ye ki wow sdang ya i e tika nadooh ka 1 tarik u Naisan kamwa da booh, wei da kyntu u ya ki paidbah wym toh u khuslai neibhah ka jylla da dep paan ko na ka sorkar pyrdi 30 lak sien i e dawai neibynta kamwa 15 lak ngut kiwa chong chnong wa da palat 18 snem i rta.
U Montri Rangbah da ong u leh wa hadooh katni ka sorkar pyrdi da e yarap ko cha ka jylla ha kiwa boon ki liang wow yakhun ya ka khlam COVID-19, khamtam ki dawai tika wa da e cha kiwa da palat 45 snem i rta iwa da e da ka sorkar India, wei lyngba ka PM Cares Fund daw booh leh ya 3 tylli ki thaw pynmih Oxygen ha ka jylla wei da jooh yarap ko leh ha kiwon kiwon ki por wa ka jylla ka emkaam ko.
Neiliang u Montri wa pait ya ka chnat i chait i khiah, u Alexander Laloo Hek da pyntip u wa ka jylla hadooh katni dang yoh pdiang ko du 42,000 tylli ki Inject neibynta wow e ya kiwa da palat 18 snem, heiwa da pyntip leh wa i e Inject daw sdang chwa na ki le tylli ki nongbah, kitæ ha Shillong, Jowai wa Tura wei kamjooh leh ha Ri Bhoi District daw e ha Byrnihat.
