Ka Jaiñtia Fishing & Environment Protection Association (JFEPA) da phah ko ya ka Wyrta yow pynche hajrong i pynmih khubor ka chnong Panaliar pyrchah ya ka Association heiwa da khang leh yei pynman yaka yakob khwe dakha kawa da toh u pynman ha ka 23 tarik uni u bnai wa kiwi de ki yalang ka JFEPA kiwa toh u pynman hapoh u pood ka Panaliar.
Neiliang u President wa u Secretary ka JFEPA da ong ki wa kam ka seiñ da man ko kawa da rim wei kawa da seiñ ha u snem 1993 wei da Register ka leh ha uni hi u snem wei da em ko kamwa 18 tylli ki Unit hapoh ka East wa West Jaiñtia Hills District da ka thong wow pynneh pynsah ya ki dohum dohwah ha waroh ki wah kiwa em hapoh ka Ri Jaiñtia.
Hadooh kini ki sngi leh dang pteiñ ko wow yarap ya ki Unit yong ka lada em ki hei eh wei heijooh i por neiliang ka Association kwah ko u pynche wa hadien wa yoh khubor ko wa em ki bru wa mut wow tdeh wei wow sai ya ka Signboard ka seiñ kawa da seh nadooh u snem 2016 hadien wa da pynbna Fish Sanctuary ya ka Syntu Ksiar lyngba i yoh bor naka JHADC, wei iwa em wa leh yeini da pynsñiawsih ko ya ka JFEPA kawa da lai e da ka ujor ha ka Jowai Police Station yow kem ya kitu kiwa leh yeini tangwa ym em kdaw næ pynmih yei pyrtuid ya kiwon kiwon.
Da pynche chooh chooh wa ka seiñ ym em khang næ pyrchah ko ya kiwon kiwon kiwa kwah u pynkhooid ya ka Syntu Ksiar Fish Santuary wei ini i thaw toh iwa da pynkhooi leh da ka seiñ kamwa ar sien le sien chi snem wei kmen ko leh lada em kiwa ya krehlang.
Heiyatoh waka yakob khwe dakha namo ka Fishing Competition yong ka seiñ kawa toh u pynman ha kani ka 23 tarik nadooh 6:00 waje i step hadooh 5:00 waje i janmiet, da kyrpaad ya ki paidbah kamjooh ki dkhot ka seiñ wow sñiawbha ki u ya chimbynta kamwa jooh man hi wei yooluti ko wow yoh yei ya krehlang na waroh khlem iwon iwon i pynthut.
Puræ leh: Khang ka Panaliar ya ka JFEPA wow pynman ya ka yakob khwe wa ki yalang hapoh u pood ka chnong
Discussion about this post