U Home Minister ka sorkar pyrdi, u Amit Shah da pyntip u wa ka Ministry u phah noh ko chisiendon yow pyndam yei lai i mih laitlooid hapyrdi ka ri India wa Myanmar iwa da chah na waroh arliang khlem da pait ya ki kot ki sla deiwa chah u psiah 16 Km chapoh kini ki ar ri.
Ki jaitbru ri-loom kani ka thaaiñ kiwa em ya kiwa ha-yung ha-sem ha waroh ar ri da chah ya ki wow psiah u mih ki khlem da thut ha uni u pood wa jrong 1,643 Km.
Kamwa man kattæ u pynkut chwa yeini deiwa pyrkhat yei bha i miat u pood ka ri kamjooh yow yada yaka ri ha waroh ki jylla wa em pood waka Myanmar. U Amit Shah da ong u wa ka Ministry da leh ko yeiwa emkaam yow pyndam noh ya kini yow khang noh yeini i rukom psiah rukom mih iwa da jooh chah.
Hachwa ini, u Shah da ong u leh wa daw kær noh ya u pood yow khang noh yeini i ya lai ya wan laitlooid.
Da khana u leh wa da em 10 Km iwa da dep kær pood ha Moreh iwa man leh kam i thaw wa chah ktah bha hei yakhih wa jia ha Manipur wei da dep leh wow mynjur yow kær pood sa 20 Km ha Manipur.
Ini i chah lai laitlooid iwa da pynkrehkaam ha u snem 2018 toh dei thmu wow pynjoor yaka khayi pateiñ wa ki ri wa em ha Southeast Asia wa kynthup yaka Myanmar wa Thailand heiwa da e laad ya ki jaitbru ri-loom wow rah ya ki mar ki na chiliang pood deiwa e da ka Border Pass kawa krehkaam chi snem wei ye ki wow sah hadooh ar tayaaw manda psiah chapoh ka ri.
U Chief Minister ka Manipur, u N Biren Singh da dep kyntu u yaka sorkar pyrdi wow pyndooh noh yeini rukom chah u psiah u mih deiwa lai kyntu yaka sorkar pyrdi nadooh u Naikhynde u snem 2023.
Kam wow pynkynmoo wa katni ha Myanmar dang em ka thma hapyrdi ki chipai sorkar wa ki chipai paidbah wei da dep jia man i por heiwa kiwa yut chnong hadooh ki chipai da psiah ki cha India khamtam ha Mizoram kawa da dap hadooh 60,000 ngut ki bru wa wan yut yow lait naka thma.
Kam wow pynmoo wa nadooh wa knieh ki chipai yei bor synchaar ha Myanmar ha u Thohlakhmai (Feb) 2021 na kti ka Aung San Suu Kyi kawa da chah jied ha ki paidbah, da ki phaw hajar ngut kiwa da hap u yut chnong wei kiwa yap leh da em ki kiwa boon bha.
Discussion about this post