Ka yalang ka dhab ki Montri (Cabinet Meeting) yong ka sorkar jylla kawa da chong yachem ynne ka sngi, da chim ya ka rai wow lai noh chakhmat yei pynkhreh wow pynskem kreh noh ya kitu ki wakreh kiwa ha waroh chai kattu ki sngi kiwa da kreh ha ki Sanction Post tangwa kiwa da kreh du kam ki Adhoc.
Hawa yaklam wa ki laad pathai khubor hadien wa wai kani ka yalang, neiliang u Montri Rangbah ka jylla u Conrad K Sangma da ong u wa kamwa da yatip lang da waroh wa ka yung bichaar Supreme Court da dep ko wow e ya ka rai (Ruling) yong ka heiwa kitu ki wakreh kaam sorkar kiwa da psiah cha ka kaam khlem da yakhun ya ka Exam wa da pynman da ka District Selection Committee, ka MPSC lane kiwon kiwon ki Exam kiwa emkaam wow pynman katkam wa toh rukom, tangwa kam kini, ki chnat krehkaam da jooh thung ya ki kam ki Adhoc wei em leh kiwa man cha baar ka Sanctioned Post leh.
Chi bhah da em i pynskem ya ki kam ki wakreh, tangwa kiwa boon won da chah ieh beiñ, kamtæ hajrong ini, da i rai na ka yung kachari hadien wa da yaleh mukotduma kini heiwa da mih da paaw ka thup yong ki wakreh kiwa em waroh hadooh 3635 ngut wa da thung Adhoc neibynta ki Sanctioned Post.
“I da chim i ya ka rai wow pynkhreh yow pynskem noh ya i kaam i jaam ka yong ki wei i pynskem kaam ya kam kini ki wakreh waroh toh hadooh wa poi yong katæ ka sngi wa ka sorkar daw pynbna ko lyngba ka Notification kawa da pynkhreh wei daw pynbna ym slem de,” da ong u Conrad.
Da ong u leh wa kini toh kiwa da kheiñ hadooh u 2007 wa da thung kreh ya ki wei kiwa da su ya ki kam ka Pay Scale wa da yoh ki wakreh pura ka sorkar. Da ban joor u wa ini toh du ya kitu kiwa da thung kreh Adhoc neibynta ki Sanctioned Post donhi.
