Ka Wrestler ka India, ka Vinesh Phogat ynne da pynbna ko lyngba ka chithi wa da thoh cha u Prime Minister wa u pynuiñ noh ko yaka Khel Ratna waka Arjuna Award kam chibynta wow pyrchah yei jied ya uwa kyrchaan ya u Brij Bhushan Sharan Singh uwa tip kam u Sanjay Kumar Singh yow man kam u President ka Wrestling Federation of India (WFI).
Ka Vinesh da ong ko wa u pynuiñ noh ko yaka Major Dhyan Chand Khel Ratna waka Arjun Award deiwa e khublei ya u Blai wa da pynpoi yaka cha kamwa man ko katni.
Ka deilang wa kiwi ki Wrestler kiwa yoh takma ha ka Olympic wa kynthup ya u Sakshi Malik wa u Bajrang Punia da man ki kam i dur yeini i pyrchah ya u President warim, u Brij Bhushan deiwa pynbaad wa leh khlem akor u ya ki kynthai wei da pynembakla yei bor.
Ka Vinesh da chim ko yeini i rai hadien wa jied ya u Sanjay Kumar Singh kam u President uwa man kam u bru u Brij Bhushan hadien wa yoh u 40 na 47 tylli ki Vote yow jop yaka Anita Sheoran kawa jooh yoh takma haka Common Wealth Games heiwa yaka Election da pynman haka 21 tarik uni u bnai.
Ha katai ka jooh ka sngi, ka Sakshi Malik kawa man dang du ka ka kynthai Wrestler napoh ka ri wow yoh takma haka Olympics pynbna ko wow chong-ngiah noh ko wow yaleh Wrestling.
Deiwa bood yaka Malik, u Bajrang Punia haka sngi wa bood da thoh u cha u Narendra Modi wow pynuiñ noh yaka Padmashree Award u.
Hajrong ini, ka Sports Ministry da dam chwa ko u tipmit chipor (Suspend) ya kiwa dang dep chah jied namo ka Election Panel neidaw wym em bood ko pyn ya ki kyndon yong ka hi hawa chim yei rai wei da phah leh yaka IOA wow thung ko da ka Ad-Hoc Panel yow pait ya ki kaam kani ka yalehke.
Hawa Suspend ya kani ka Panel wa thymme, ka sorkar da ong ko wa da pynbna jhan ko yaka U-15 wa U-20 National Championship khlem da e por chwa ya ki Wrestler wow pynkhreh ki.
Discussion about this post