U pyrchang biang ka Congress wow chna sorkar hapoh ka jylla: HM Shangpliang

Shillong: Ka Congress ha Meghalaya daw pyrchang biang ko wow chna sorkar ha ka jylla deiwa yaklam biang wa kiwi ki paralok wa yajan yow yoh chna ya ka sorkar synrop.

Ka Congress hadien wa chah rem ko haka Election chiteiñ samoi ha Selsella da em ko sa 19 ngut ki MLA wei duna ko yaka NPP kawa em katni 21 ngut ki MLA. Tangwa da pynsñiaw wa ini i duna ym da pher ware. “Lada i jop i na Selsella da man mar 20 ngut ki MLA wa ka NPP, wei hadooh katni leh ym em kiwa heh paaid samen wow chna sorkar,” da ong u HM Shangpliang uwa e ktien ka Party Congress.

“I pyrchang i waroh ki luti wow yaklam wa ki paralok wow thooh ki laad wow yoh chna yaka ka sorkar, i emkaam i wow ya syllok katni yow leh kiyi kiyi neibynta wow chna ka sorkar wa thymme,” da ong u.

Uwa yahkhmat ka Congress da kyntait wow khana lada ka yaklam da lai bait ko næ ym em wa kiwi ki Party, tangwa da ong u, “Nga ym khana lut O tangwa kamni wa nga ong O da biang. I por daw batai ko wa lada i daw ya krehlang.”

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Ha kawi tawon i liang u Shangpliang da pyntip u wa ka Congress Legislature Party (CLP) daw chong ko yaka yalang wow yaklam heiyatoh waka Election MP cha Lok Sabha kawa dang dep.

Ka Congress ha Meghalaya da pynyakhun ko ha waroh ar tylli ki Parliamentary Constituency ha kani ka Election wa dang dep wei da jop ko na Shillong da u Vincent H Pala, katwa ha Tura, u Dr. Mukul Sangma da chah rem noh u ha ka kyrtong yong ka NPP.

U Shangpliang da ong u wa lada man kammon kammon leh, kam ha ini i chah rem ha kani ka Election wa heh dooh ha waroh ka ri India, burom ki ya i rai ki paidbah.

“I burom i yaka rai wa da e da ki paidbah ka Shillong Seat kiwa da e i jop emburom ya u Vincent Pala. I burom i leh ya ka rai ki paidbah ha ka Tura Seat hanlada ym em yoh yei jop na kani ka thaw,” da ong u.

Heiyatoh wa yoh du le ngut ki MP ha ka thaaiñ mihngi da ong u, “I emkaam i wow bichaar wow thooh ya ki daw wa chah rem ka Party ha ka ri India waroh kawi wei kamjooh ha kani ka thaain.”

“Heiwon bakla, iyi i daw wa bakla ha kani ka Election wa chah rem tput, i hap i wow bichaar bniah bha lada toh wa bakla yong kiwa yahkhmat ka Party næ ka Party waroh kawi næ wa em kiwi won ki daw wa khanglaad ya ka Party wow yoh ya i jop,” ong u Shangpliang.