Ka Joint Action Committee (JAC) kawa da emlang nadooh ka FKJGP Jaiñtia Zone, KSU Namdong Unit wa ka kynhun kiwa yalam chnong hapoh ka thaaiñ Namdong ynne ka sngi hapoh i yahkhmat u MDC ka thaaiñ u Dawan Lyngdoh, u Damian War, Chief Organizing Secretary FKJGP, u Juhhi Tariang Secretary KSU wa ki Waheh Chnong kani ka thaaiñ da lai ki wow yachem ya u Doctor In-charge yong ka Namdong PHC wow tip yei daw yong i tkoh krehkaam ka Namdong PHC katni ki sngi.
Ha i yachem wa u Doctor In-charge kani ka PHC da pyntip u wa ym ye wow e yei chakri wa biang ya ki paidbah neidaw wa duna ki Nurse wei heijooh i por em du oo samen u MBBS Doctor wei ha ka chi tayaw em ki sngi wa hap u wow lai cha ki Meeting neibynta ki kaam ka PHC wei ini ktah ko ya ki paidbah khamtam i chah kyrriah keh ki Nurse kiwa kreh ha kani ka PHC wei ym em de thung won da kiwi heithaw kiwa chah kyrriah.
Ka Namdong PHC ka em ko sa iwi i kreh MBBS wa lait, ki Grade-IV ar ngut, i kreh LD iwi, ki Chowkidar uwi, ki Nurse sa le ngut. Kiwa jooh kreh Nurse ha kani ka PHC ar ngut da lai puræ ki wei kawi da chah kyrriah noh wei ki Nurse ha kani ka PHC katni em ki du ar ngut iwa da booh hei eh wow pait ya kiwa chitom neibhah kiwa kjut wa chitom toh kiwa boon wei du ar ngut ki Nurse ym ye ki wow e ya i sumaar wa biang ya ki 31,000 ngut ki paidbah kani ka thaaiñ.
Ka JAC ynne ka sngi deiwa ya emlang u MDC ka thaaiñ da chim ki yaka rai wa nyngkong heiyatoh wa i lai luti wow lai rah, lai pynsñiaw cha ki bor wa toh u pait ya i chait i khiah hajrong ini wei lada ym ap yeini i eh ki paidbah kani ka thaaiñ, ka JAC daw chim won ko da kiwi ki luti yow dawa yei hok ki paidbah.
