Written By: Solangki D Laloo
U Kiang Nangbah toh u khon ka Nia Rimai Nangbah uwa dawan na ka kur ka jait soo kpoh, u Kiang ymtoh u syiem, u Dolloi nae u wakhroo watri, oo toh u bru paidbah tangwa dei chlur mynsien yong oo wow yieñ yada yei hok kynti ka ri wa ka jaitbru, pynman ko ya oo wow poi u chadooh i kyrdan Khlawait.
157 snem nachwa yaambru ka ri wa ka jaitbru deiwa dooh yow Khlawait u Kiang Nangbah, uwa da yieñ dap chynrang wow yaleh pyrchah ya ki chipai ka sorkar phareng kat hadooh wow poi u pood ya oo wow chah da’u radang ha’u tylle pasi neibynta ka ri wa ka jaitbru.
Kam ki pateiñ kani ka juk katwon sñiawsuk u ap, u sñiaw yei parom ki khon ka Ri 12 Dolloi ha ki spah snem kiwa dalai, heipor iwa ka sorkar phareng da kawi ka thong, ka yurim yoohkjat ko ha kini ki loom wow luchia yei kaam synchaar khadar wei man kyrpang ka jaitbru deiwa luchia ya ki kaam niam, rukom kat hadooh wow hap ki khon ka Ri 12 Dolloi hei yahkhmat u Kiang Nangbah wow yieñ yaleh pyrchah ya ki chipai ka sorkar phareng.
U Kiang Nangbah kam uwa yahkhmat næ uwa yalam ki khon ka Ri 12 Dolloi, man sakhiat u u bru wa chlur wei yoh yei chaniah na ki khon ka Ri 12 Dolloi, dei chakri hok wei maya ya ka ri wa ka jaitbru kat hadooh wa pynman ko ya oo wow kut i im wa kordor yong oo neini na sla khyndaw pyrthai ha’u tylle pasi.
Ya u Kiang Nangbah da Pasi ha ka 30 tarik u Kmaichonglad hakhmat ka yaw ka syiem hapyrdi ki umkhmat sñiawsih yong ki wa boon ki khon ka ri kiwa yoh u yoo, u sakhi yei kut i im yong oo. Chwa wow pasi ya oo, ki chipai phareng da e laad wow klam hakhmat ki khon ka Ri 12 Dolloi, u Kiang kam u bru wa yieñ ha ka yurim yong i hok, ki kyntien khaddooh dei khmat wyrai ya ki khon ka ri, ong u man da pasi ki ya nga, “Lada i khmat O kyruiñ i cha mihsngi, hapoh 100 snem ka ri ka jaitbru daw yoh ko yei laitlooid. Lada kyruiñ wan i cha sepsngi hai hai da sep, rata hei broo u im ka ri ka jaitbru”. Ki kyntien Blai u Kiang Nangbah, pynyoo ki ka dak ka sakhi hakhmat ki khon ka ri, i naam u Kiang Nangbah kam u Khlawait, uwa yaleh laitlooid wa hok wa chlur wei chisur i man, da hær da bna i kylleiñ kat hadooh wa ki pateiñ wa dalai wa ki pateiñ wa katni dei sñiaw wym kyllep rata, chimkhia ki wow pynkhroo yei naam, i burom wei pyrtuid u Kiang Nangbah ha ki dur, ki rukom waphær waphær.
E wa wa kani ka lyngkhooh snem yap u Kiang Nangbah u man ko ka por kawa oo wan u wow kyrsu thiah ya i ki pateiñ ka ri u Ñiawtrep Ñiawskum wow man i ki bru kiwa yatylli, wa chlur wei yieñskem ha ka yurom yong i hok wow chakri ya ka ri wa ka jaitbru.
