U heh ka All India Congress Committee (AICC) uwa pait ya ka jylla Meghalaya, u Manish Chatrath da ong u wa ki paidbah ka jylla pait ki katni wei yoo ki yei kylla kamjooh leh maya ki ya ka seiñ Congress.
Da ong u wa ka Party daw em ko jar jiar i rukom krehkaam, wei daw em ki kattu katni ngut ki heh kiwa daw psiah cha ka Party tangwa ya katni dang kwah ki wow murieh pyrtuid.
Da ong u leh wa ka MPCC da sdang pynkhlan biang ko chwa wow lai cha ka Election MLA 2023 ha ka jylla, deiwa pynsñiaw leh wow pynyakhun na waroh 60 tylli ki Constituency ka jylla wei daw jied ya ki kyrtong lyngba ka Election Committee wow phah won cha ka AICC wow yoh yei mynjur.
Hawa kylli ya ka khubor wa thmu wow khut biang ya u Dr. Mukul Sangma cha ka Party, u Manish da kyntait u yeini deiwa ong wa ka MPCC leh ymtip ko kam ya kani ka khubor.
Heiyatoh won wa i krehlang wa kiwi ki seiñ hadien ka Election, da ong u wa ka Party ympu klam ko iwon iwon hajrong ini neibhah wympu biang i por.
Chooh chooh heiyatoh wa ki 5 ngut ki MLA wa da chah beh seiñ chipor nei man dkhot ka Party, da ong u wa ka Party ympu yoh yutip ko wow wan uiñ biang ki cha ka Party.
