Jowai : Hadien wa da kut i seh lama yong ki skur wa yoh yarap na ka Sarva Shiksha Abhiyan (SSA) kiwa em kamwa 5000 tam hapoh ka jylla wa sdang nadooh ka 19 tarik uni u bnai da kut ko ynne ka sngi, u Aristotle C. Rymbai, President ka Meghalaya SSA School Association (MSSASA) da pyntip u wa i yakhih kawa bood deiwa chah thnang le sngi lynter kawa mut wow sdang nadooh ka 26 tarik uni u bnai da pynsangeh chwa ya ka.
Ka seiñ da chim ko ya kani ka rai hadien wa ka bui (report) hajrong i dawa yong ka katkam wa yoh jubab RTI ha ka 24 tarik uni u bnai wa kdaw ko wa ki kaam lai bait ki katkam wa yaklam wa ki sahep ka tnat puræ puthi, da ong u bah H.M.Marbaniang General Secretary ka MSSASA.
U Aristotle C. Rymbai da pyntip u wa katkam ka bui na u State Project Director, SEMAM uwa man leh u Director ka School Education and Literacy, ka tnat da ong ko wa ka poisa kawa da em chwa ha ka sorkar jylla wow su ya ka tulop thymme wa kawa dang sah yong ki 12,481 ngut kiwa sikai SSA nadooh ka 1 Naitung 2016 em ko T. 21.84 Klur wei ka sorkar dang yang ko sa ya ka 2nd Installment na ka sorkar bei khnang wow yoh u pyllait noh ya kani ka tulop wei ka sorkar jylla emkaam ko kamwa T. 100 klur tam kamwa da dep mang wei da mynjur da ka Project Approval Board (PAB) 2016-17 yong ka tnat Human Resource Development (HRD) ka sorkar bei.
Da yoh leh ya kiwi ki kot ki sla kiwa pynche wa kiwi kiwi ki dawa ka seiñ kiwa kynthup ya i pynku tulop ya ki 4th Teachers, ka result Diploma in Elementary Education (D.El.Ed) wa kiwi kiwi da lai bait ki wei waroh kini daw rah ha ka General Meeting ka wa daw man ha ki sngi wow wan ha Shillong wei daw chim ya ki yumut yong kiwa sikai SSA wa 4th Teachers, da ong u H.M.Marbaniang.
Ka seiñ da pyntip ko wa daw lai yachem ko leh wa ka Deborah Marak kawa man ka montri wa pait ya ka School Education and Literacy wa ya ka Roshan Warjri montri ka Higher & Technical Education ka sorkar jylla.
Discussion about this post