Ki Association kiwa kamai kari kiwa em hapoh Ri Jaiñtia (West & East Jaintia Hills District) kiwa em hapoh ka lama yong ka All Jaintia Tourist & Commercial Vehicle Association kiwa kynthup nadooh ki kari Tourist, ki Local Taxi (West wa East Jaintia Hills District) chirup deiwa ya krehlang wa ka EJHDA (Truck) ha ka yalang wa da pynman ynne ka sngi ka 8 tarik ha Paradiso Conference Hall, Jowai heipor 11:00 waje i step da e ya i kyrchaan wa pura yaka Meghalaya Joint Action Committee of Commercial Vehicle, Shillong wei da rai leh wa nadooh wa kylla tarik cha ka 9 tarik u sangeh noh i kamai kari waroh.
Ya kani ka rai da chim neidaw wa ka sorkar wym ap wym sñiaw ko yei kyrpaad kiwa yah kari heiyatoh wa i pynduna ya i dor yong i Petrol wa i Diesel. Ka Association da iwi i yumut da rai ko wow sangeh kamai kari khlem booh por katwa ka sorkar ym pu ye ko wow pynduna ya i dor phniang kari (Petrol wa Diesel)
Kamtæ da kyrpaad ya phi ki paidbah waroh wow sñiawbha u ya krehlang chirup chirup khnang wa ki kaam u man ki iwa lai bait.
Da kyrpaad leh ya ki kari ki bru samen (Private) waroh wow e sñiawbha phi i kti timun tidiang dei wym hoi u chim kabu phi wow kamai ha kini ki sngi wa em ka sangeh ki kari kamai.
Ka kyrwoh na u Mihsalan Dhar, Publicity Secretary ka All Jaintia Tourist & Commercial Vehicle Association.
