Hadien waka sorkar da chah ko wow pynman biang yaki yaw kiwa jooh pynman chisien chi tayaw, neiliang ka Executive Committee yong ka chnong Wahiajer, West Jaiñtia Hills lyngba u Secretary Iawpynsin Wahiajer u W. Phawa da pyntip ki wow sdang noh yaka Iawpynkat kamjooh yaka Iawpynsin nadooh ka 01-07-2020, kawa man ka sngi Iawpynkat waka 04-07-2020 ka sngi Iawpynsin.
Kamtæ neiliang u W. Phawa da ong u wa yaki dukan lane ki Stall kiwa em haka Iawpynsin u ye ki u wai da Ki Odd waki Even Number, kamtæ neiliang ka Executive Committee ka dorbar chnong Wahiajer da kyntu ko ya kiwa wan thied wa kiwa dai u sñiawbha ki u bood ryntih katkam wa pynlai Ka Market COVID-19 Management Committee yong ka chnong Wahiajer.
Chooh chooh neiliang u Secretary Iawpynsin da pyntip u leh ya kiwa dai ha kani ka yaw toh du kiwa napoh West Jaiñtia Hills District donhi katwa kiwa nabaar District neiliang ka Committee ym pu ye ko u chah u chong dai ki kat wym pu pyntip da kawi tawan ka khubor, da ong leh wa kiwa dai u pynbiang ki yaki Mask kamjooh leh yaki Sanitizer, kamjooh ya kiwa wan thied, wa ka yaw u sdang ko nadooh 9 waje i step hadooh 6 waje i miet.
