Ka wat kawa ar i yaklam pynbait pood hapyrdi ka jylla Meghalaya wa Assam kawa da pynman ynne ka 6 tarik hapyrdi ki ar ngut ki Montri Rangbah, u Conrad Kongal Sangma wa u Himanta Biswa Sarma deiwa emlang leh da ki Montri yong waroh artylli ki sorkar deilang wa ki heh sorkar wa ki Chief Secretary, da pynman ha Assam.
U Conrad K Sangma da ong u wa ki ar jylla da pynsñiaw ki yei thrang wow pynbait noh ya u pood u ang, wei toh u man ko deiwa burom markylliang. Da pyntip u wa ha ka yalang, ka Assam da batai bniah bha ko hawa yatoh wa ki 6 tylli ki thaw na ki 12 tylli kiwa da tipmit kam ki thaw wa em i ya kajia, wei ya kini ki 6 tylli ki thaw daw pynbait chwa iwi hadien iwi.
U Montri Rangbah ka Meghalaya da ong u wa ki 6 tylli ki thaw wow sdang chwa u pynbait u man ki ka Tarabari, Gizang Reserve Forest, Hahim, Boglapara, Pilangkata Khanapara wa ka Ratacherra.
Da pyntip u leh wa daw chna da ki Regional Committee 3 tylli na waroh ar liang, wei kini ki Committee hadien wa da lai ki wow pait lang ya kitai ki thaw hapoh chi bnai, daw e ki leh ya ka bui (Report) yow e yumut cha ki sorkar. Da ong chooh chooh u wa ha kini ki 30 sngi, neiliang waroh ar tylli ki sorkar, daw lai pait ki leh cha ki kattu katni tylli ki thaw wa ya kajia khappood, wei ini i lai pait daw man ko hapoh i yahkhmat ki Montri Rangbah.
U Montri Rangbah ka Assam da ong u wa ha ka yalang kawa man ha Shillong da yaklam bniah ya ki 12 tylli ki thaw wa ya kajia, wei ynne ka sngi da chimkhia chwa ya ki 6 tylli ki thaw khappood, deiwa pyntip leh wa kini ki thaw neiliang ka Assam da em ki hapoh Cachar District, Kamrup Metro wa Kamrup District, katwa neiliang ka jylla Meghalaya em ki ha West Khasi Hills District, Ri-Bhoi wa East Jaiñtia Hills.
Da pyntip u leh wa da rai wow booh ya ka Regional Committee wow khlieh da ki Montri yong ka sorkar na waroh ar tylli ki jylla wow emlang leh da ki sahep sorkar wa ki MLA yong ki thaw khappood, wei ha i jooh i por da rai leh wow chna ya ka Joint Committee wa 10 ngut wa em 5 ngut na Assam wa 5 ngut na Meghalaya.
Da pyntip u leh wa kani ka Committee daw lai pait ko cha khappood wei daw phah ya ka Report hapoh 30 sngi, da ong u leh wa ha i lai pait ka Regional Committee, daw yachem leh ya kiwa synchaar chnong wa kiwi kiwa embynta wei sñiawthooh yei long i man.
Da pyntip u leh wa hadien wa ki Regional Committee da dep ki wow yatai sani bha, daw e yumut cha ki sorkar jylla, wei daw bichaar biang ha ka yalang ki Montri Rangbah, tangwa lada ym ye wow pynbait da ki Regional Committee, ya ki rai daw rah bait cha ki Montri Rangbah yong ki ar jylla næ cha kiwa rap haneiñ.
U Himanta da ong u leh wa hadien wa da dep wow pynbait ya ki 6 tylli ki thaw, waroh ar tylli ki sorkar daw pynbait noh ko ya ki 6 tylli ki thaw kiwa dang sah. Da pyntip u leh wa ki Montri Rangbah daw lai lang ki leh wow lai pait ya ka Langpih ha ki sngi wow wan.
